شہر کے 3 بڑے منصوبے 2 ماہ میں مکمل کرنے کی مہلت
لاہور(شیخ زین العابدین)نگران پنجاب حکومت نے دور اقتدار ختم ہونے سے قبل بڑے منصوبوں کو مکمل کرنے کا فیصلہ کرلیا، پانچ منصوبے مکمل کرنے کے بعد مزید 3 کو دو ماہ میں ہی مکمل کرنے کی ڈیڈ لائن دے دی۔
تفصیل کے مطابق نگران پنجاب حکومت کے 10 ماہ مکمل ہوچکے ہیں، اس دوران لاہور میں 8 سے زائد میگا پراجیکٹس پر تعمیراتی کام کا آغاز کیاگیا، اب جہاں عام انتخابات کی تیاری کی جارہی ہے وہاں نگران پنجاب حکومت شروع ہونے والے ترقیاتی منصوبوں کو بھی جلد از جلد مکمل کرنے کے لئے تگ و دو کر رہی ہے ۔ حکومت نے ایک ماہ کے دوران میگا پراجیکٹس کی تکمیل میں ہیٹرک مکمل کر لی تاہم شہر میں باقی مزید میگا پراجیکٹس کی تکمیل کیلئے نئی ڈیڈ لائن دے دی ۔نگران وزیر اعلیٰ نے سی بی ڈی پنجاب کے 3 میگا پراجیکٹس کیلئے ڈیڈ لائن دی۔ گھوڑا چوک فلائی اوور کی تکمیل کیلئے 7 دسمبر ،سی بی ڈی پنجاب مین بلیوارڈ 31 دسمبر ،والٹن روڈ کی اپ گریڈیشن کا کام مکمل کرنے کیلئے 31 جنوری 2024 کی ڈیڈ لائن دی گئی۔واضح رہے کیولری انڈر پاس مکمل ہونے کے باوجود والٹن روڈ تک سگنل فری راستہ نہ بن سکا، نگران پنجاب حکومت ایل ڈی اے کے 5منصوبے مکمل کر چکی ہے ۔ نگران دور اقتدار میں سمن آباد انڈر پاس ،شاہدرہ فلائی اوور اور بیدیاں انڈر پاس منصوبے مکمل ہوچکے ہیں۔نگران وزیر اعلیٰ نے سی بی ڈی حکام کو نئی ڈیڈ لائن پر سختی سے عمل درآمد کا حکم دے دیا۔
