ترقیاتی سکیموں کیلئے 39ارب 73کروڑ کے فنڈز منظور
لاہور( سیاسی نمائندہ)پنجاب پلاننگ اینڈ ڈویلپمنٹ بورڈ نے مالی سال 2024-25کے صوبائی ڈویلپمنٹ ورکنگ پارٹی کے 63ویں اجلاس میں روڈ سیکٹر کی 5 ترقیاتی سکیموں کیلئے مجموعی طور پر 39ارب 73کروڑ 2لاکھ 95ہزار روپے کی منظوری دیدی۔
اجلاس کی صدارت چیئرمین پلاننگ اینڈ ڈویلپمنٹ بورڈ بیرسٹر نبیل احمد اعوان نے کی۔ اجلاس میں جن سکیموں کی منظوری دی گئی ان میں بہاولپور میں بہاولپور تا جھانگرہ شرقی انٹر چینج روڈ کی تعمیر (ترمیمی)کیلئے 4 ارب 59کروڑ 45لاکھ 50ہزار روپے ، خانیوال میں میاں چنوں تا عبدالحکیم انٹر چینج براستہ تلمبہ روڈ کو دو رویہ کرنے (ترمیمی) کیلئے 3 ارب 3کروڑ 92لاکھ 84ہزار روپے ، گوجرانوالہ اور حافظ آباد میں کوٹ سرور کے مقام پر گوجرانوالہ تا ایم ٹو انٹرچینج براستہ حافظ آباد روڈ کو دو رویہ کرنے (ترمیمی)کیلئے 13ارب 28کروڑ 81لاکھ 47ہزار روپے ، خوشاب میں سرگودھا -خوشاب - میانوالی روڈ کو دو رویہ کرنے کیلئے 11ارب 80کروڑ 65لاکھ 16ہزار روپے اور سیالکوٹ، نارووال میں سیالکوٹ کینٹ تا جسر گیریژن روڈ کی کشادگی و بہتری (ترمیمی)کیلئے 7 ارب 5کروڑ 89لاکھ 45ہزار روپے شامل ہیں۔
