پنجاب فوڈ اتھارٹی ، 10 ہزار کلو مضر صحت گوشت برآمد
لاہور(اپنے سٹی رپورٹر سے)ڈی جی فوڈ اتھارٹی عاصم جاوید کا رات گئے ٹیموں کے ہمراہ بکر منڈی میں چھاپہ، 10ہزار کلو زائد المیعاد، مضر صحت گوشت برآمد کر کے مقدمہ درج کروا دیا گیا اور4 ملزمان موقع سے گرفتار کرا دیے گئے۔
تفصیلات کے مطابق گوشت تلف کر دیا گیا، بکر منڈی میں موجود کولڈ سٹور میں ایکسپائر گوشت سٹور کیا گیا تھا، ڈی جی فوڈ اتھارٹی نے بتایا کولڈ سٹور کا ٹمپریچر مقرر کردہ حد کے مطابق نہ تھا، گوشت کی رنگت نیلی کالی، کولڈ سٹور میں تعفن زدہ ماحول پایا گیا، سٹور میں صفائی کے ناقص انتظامات، حشرات اور جانوروں کی بھرمار پائی گئی، برآمد شدہ تمام تر گوشت قانونی کارروائی کے بعد تلف کر دیا گیا، بیمار مردہ جانور نواحی علاقوں سے لا کر گوشت تیار کیا جارہا تھا، ڈی جی فوڈ اتھارٹی نے کہا کہ تلف کردہ گوشت لاہور شہر کے مختلف ہوٹلز پر سپلائی ہونا تھا، ویجیلنس ٹیمیں جلد از جلد جعلسازوں کے گروہ کا پتہ لگا کر رپورٹ پیش کریں، غیر قانونی مذبح خانوں کے خلاف متعلقہ محکموں کے ساتھ مل کر قوانین میں ترامیم کر رہے ہیں، خوراک میں جعلسازی کرنے والوں کو کے گرد شکنجہ سخت، منتقلی انجام تک پہنچائیں گے ،شہری خوراک کے چناؤ کے حوالے سے محتاط رویہ اپنائیں، غذائیت سے بھرپور اشیا کا استعمال یقینی بنائیں۔
