ریلوے :پراپرٹیزکی نیلامی قواعد کیمطابق کرنیکی ہدایت
لاہور(اپنے کامرس رپورٹر سے)ڈویژنل سپرنٹنڈنٹ ریلوے لاہور انعام اللہ نے بادامی باغ ریلوے سٹیشن کا غیر اعلانیہ دورہ کیا۔ دورے کے دوران ڈی ایس نے ریلوے کے کارگو کنٹریکٹرز کے گوداموں، کمرشل ریکارڈ اور پراپرٹی و لینڈ برانچ کی نیلامی کے لیے مختص اراضی کا تفصیلی معائنہ کیا۔
ڈی ایس لاہور نے ہدایات جاری کیں کہ نیلامی کا عمل پاکستان ریلوے کے قواعد و ضوابط کے مطابق فوری طور پر مکمل کیا جائے ۔ انہوں نے کمرشل ریکارڈ کی جانچ کے دوران عملے کو متنبہ کیا کہ کنٹریکٹرز کی جانب سے الاٹ شدہ جگہ سے زائد اراضی پر قبضے کی ہرگز اجازت نہ دی جائے۔معائنے کے دوران پانچ کارگو کنٹریکٹرز کو اضافی کھلی جگہ پر غیر قانونی قبضہ کرنے پر موقع پر جرمانے کیے گئے ۔ ڈی ایس نے واضح کیا کہ ریلوے کی قیمتی اراضی کا تحفظ ہر صورت یقینی بنایا جائے گا۔بعد ازاں ڈی ایس لاہور نے اسسٹنٹ اسٹیشن ماسٹر کے دفتر کا دورہ کیا، جہاں انہوں نے سی بی آئی سیگنلنگ سسٹم کی کارکردگی، مختلف رجسٹرز اور سابقہ انسپیکشن رپورٹس کا جائزہ لیا۔ انہوں نے افسران کو ہدایت کی کہ تمام انسپیکشنز بامقصد اور نتائج پر مبنی ہوں تاکہ نظام میں بہتری لائی جا سکے ۔اس موقع پر ڈویژنل کمرشل آفیسر عدنان مروت، ڈپٹی ڈائریکٹر پراپرٹی و لینڈ عبد الرحمان اور دیگر متعلقہ افسران بھی ڈی ایس کے ہمراہ موجود تھے۔
