10اپریل تک رمضان بازار فعال کرنے کی ڈیڈ لائن
چھٹی کے دن افسروں کا اجلاس ،آٹے کے 9لاکھ 60ہزار تھیلے رعائتی نرخوں پر فراہم کئے جائینگے ،یوٹیلیٹی سٹورز کا سٹال بھی لگے گا،پارکنگ فری ہو گی :ڈپٹی کمشنر
ملتان (وقائع نگار خصوصی)ماہ صیام میں ضلعی انتظامیہ نے 11رمضان بازار لگانے کیلئے ہوم ورک مکمل کرلیا ۔ڈپٹی کمشنر علی شہزاد نے رمضان بازار فعال کرنے کیلئے 10اپریل کی ڈیڈ لائن دیدی ہے ۔ ہر رمضان بازار میں یوٹیلیٹی سٹورز کا سٹال بھی لگے گا۔ رمضان بازاروں کی اہمیت کے پیش نظر ڈپٹی کمشنر علی شہزاد نے اتوار کو افسران کا اجلاس طلب کر لیا ۔ ایڈیشنل ڈپٹی کمشنر ریونیو ریونیو محمد طیب خان، ایم ڈی ویسٹ مینجمنٹ کمپنی فخرالاسلام ڈوگر، اسسٹنٹ کمشنر صدر آبگینے ، سب رجسٹرارز،ڈی ایف سی احمد جاوید، سی ٹی او، ریسکیو، کارپوریشن، زراعت اور مارکیٹ کمیٹی کے افسران نے اجلاس میں شرکت کی۔ملتان سٹی، شجاع آباد اور جلالپور پیروالا کے اسسٹنٹ کمشنرز نے ویڈیو لنک کے ذریعے اجلاس میں شریک ہوئے ۔ ڈپٹی کمشنر علی شہزاد نے اجلاس سے خطاب کرتے ہوئے کہا کہ حکومت رمضان بازاروں میں آٹے کے 9 لاکھ 60ہزار تھیلے رعائتی نرخوں پر فراہم کئے جائیں گے ۔غیر معیاری آٹا فروخت کرنے کی بری شہرت رکھنے والی فلور ملز کو کسی صورت سرکاری گندم کا کوٹہ جاری نہ کیا جائے ۔اجلاس میں آٹے کی بلیک مارکیٹنگ روکنے کیلئے حکمت عملی بنا لی گئی۔ڈیجیٹل سسٹم میں شناختی کارڈ نمبر درج کرنے سے ایک دن آٹا خریدنے والے شہری کو دوسرے دن آٹا نہیں ملے گا۔ہر رمضان بازار کیلئے ایک انچارج آفیسر مقرر کیا جائے تمام رمضان بازاروں میں الیکٹرانک پرائس بورڈ نصب کئے جائیں۔علی شہزاد نے رمضان بازاروں کیلئے قائم کنٹرول روم کیلئے ٹال فری نمبر حاصل کرنیکی بھی ہدایت کی۔ ڈپٹی کمشنر نے ویسٹ مینجمنٹ کمپنی کو صفائی کا ٹاسک دیدیا محکمہ سول ڈیفنس رمضان بازاروں میں واک تھرو گیٹس لگائے گااور پارکنگ فری ہو گی۔
