زکریا یونیورسٹی:معاشی بحران،بس سروس رکنے کا خدشہ
ملتان(خصوصی رپورٹر) زکریا یونیورسٹی معاشی بحران میں گھر گئی ،دوماہ ہوگئے خزانہ دارکے آرڈر نہ ہوسکے ، بس سروس رکنے کا خدشہ، بلنگ بھی بند ہوگئی۔۔۔
تفصیل کے مطابق زکریا یونیورسٹی میں اس وقت معاشی بحران سراٹھارہا ہے جس کی وجہ یونیورسٹی کے خزانہ دار کا نہ ہونا ہے قائم مقام ڈائریکٹر فنانس کی مدت اگست میں ختم ہوگئی تھی نئے خزانہ دار کی تعیناتی کی سمری جولائی میں ارسال کردی گئی تھی مگر تاحال منظوری نہ دی گئی،ذرائع کا کہناہے سمری سی ایم ہائوس میں رکی ہوئی ہے جس کی منظوری کے بعد اگلا مرحلہ شروع ہوگا دوسری طرف یونیورسٹی کے خزانہ دار نہ ہونے کی وجہ سے تمام اقسام کی بلنگ بھی رک گئی جس سے یونیورسٹی کی بس سروس بند ہونے کا خدشہ پیدا ہوگیا دیگرشعبوں کے بل بھی تعطل کا شکار ہوگئے ،یونیورسٹی کے اعلیٰ حکام سنجیدہ دکھائی نہیں دے رہے ہیں تاحال خزانہ دار کی تعیناتی پر شکوک کے باد ل چھائے ہوئے ہیں۔ ڈیلی ویجز ملازمین، پارٹ ٹائم ٹیچرز اور ٹھیکیدار اس وقت شدید پریشان دکھائی دیتے ہیں انہوں نے اعلیٰ حکام سے مطالبہ کیا ہے کہ اس کا نوٹس لیا جائے اور خزانہ دارکی تعیناتی کی جائے ۔
