نبی کریم ؐ کی حیات مبارکہ مشعل راہ ہے ،علامہ ثاقب مصطفائی
ملتان (خصوصی رپورٹر)ایم این ایس زرعی یونیورسٹی میں ڈائریکٹوریٹ آف پبلک ریلیشنز، قرت اور نعت کلب کے زیر اہتمام سیرت النبی ؐ سیمینار کا انعقاد کیاگیا۔
جس میں خصوصی خطاب پیرزادہ محمد رضا ثاقب مصطفائی نے کیا۔تقریب کا باقاعدہ آغاز تلاوت کلام پاک سے کیا گیا۔وائس چانسلر پروفیسر ڈاکٹر آصف علی(تمغہ امتیاز)نے خوش آمدید کیا اور کہا کہ مسجد ایک درس گاہ اور مقدس جگہ ہوتی ہے جہاں پر نماز کے ساتھ ساتھ تعلیم بھی ہونی چاہئے اسی مقصد کیلئے آج کے دن اس سیمینار کا انعقاد جامع مسجد فاطمۃ الزہرا میں کیاگیا۔محمد رضا ثاقب مصطفائی نے کہا کہ حضور ﷺ کی زندگی ہم سب کے لیے مشعل راہ ہے ہم سب ان کی زندگی پر عمل کرکے کامیاب ہوسکتے ہیں۔ہمیں آج سوچنا ہوگا کہ رسول اکرم ؐ جس مقام پر ہمیں کھڑا کر گئے تھے ہم اس سے ہٹ تو نہیں رہے ۔آج ہم یہ بھی فیصلہ کر لیں کہ ایمان و عمل والی زندگی بسر کریں۔بد عقیدگی اور بد عملی سے دور رہنا ہے ۔جب ہم ان کی سیرت کو اپنائیں گے تو اللہ تعالی ہمیں حضور اکرم ؐکی سیرت کے صدقے معاف فرمائیں گے ۔اس موقع پر یونیورسٹی کی فیکلٹی سٹاف اور طلباء و طالبات کی کثیر تعداد موجود تھی۔آخر میں انہوں نے وائس چانسلر کے ہمراہ یونیورسٹی میں پودا بھی لگایا اور یونیورسٹی کی ترقی کے لیے نیک خواہشات کا اظہار کیا۔
