ایمرسن یونیورسٹی ،بینک میں اہم اشتراک عمل میں لانے کا فیصلہ
ملتان(خصوصی رپورٹر)ایمرسن یونیورسٹی ملتان اور مقامی بینک کے درمیان ایک اہم اشتراک عمل میں لانے کا فیصلہ کیا گیا ہے ۔۔
جس کا مقصد پیشہ ورانہ ترقی، اسلامی فنانس کی تعلیم کے فروغ اور طلبہ کیلئے روزگار کے مؤثر مواقع پیدا کرنا ہے ۔اس حوالے سے ایک اعلیٰ سطحی اجلاس منعقد ہوا جس میں ایمرسن یونیورسٹی کے وائس چانسلر پروفیسر ڈاکٹر محمد رمضان اور بینک کے ہیڈ آف لرننگ،ہیومن ریسورسز اسد حمید نے شرکت کی۔ اجلاس میں دونوں اداروں کے درمیان ایک مفاہمتی یادداشت کے مسودے پر تبادلہ خیال کیا گیا۔ مجوزہ یادداشت کے تحت بینک کے ملازمین کو ایمرسن یونیورسٹی میں تربیت فراہم کی جائے گی جو یونیورسٹی کے تجربہ کار اساتذہ کی زیر نگرانی ہوگی۔ اس کے علاوہ اسلامی فنانس پر آگاہی سیشنز کا انعقاد اور بینکنگ صنعت سے ہم آہنگ تعلیمی و تربیتی کورسز کی مشترکہ تیاری بھی معاہدے کا حصہ ہوں گے۔اس اشتراک کا ایک اہم پہلو طلبہ کیلئے مواقع کی فراہمی ہے۔
