کمشنر کی زیر صدارت پولیو مہم کے انتظامات کا جائزہ اجلاس
سرگودھا(سٹاف رپورٹر) کمشنر سرگودہا ڈویژن جہانزیب اعوان کی زیر صدارت اجلاس میں 21 اپریل سے شروع ہونے والی پانچ روزہ انسداد پولیومہم کے انتظامات کاجائزہ لیاگیا۔
اجلاس میں چاروں ڈپٹی کمشنروں نے پولیو مہم کے سو فیصد اہداف یقینی بنانے کیلئے اپنی تیاریوں، مائیکروں پلان، فیلڈ اسٹاف کی ٹریننگ، افرادی قوت، ریزروفورس سمیت دیگر اقدامات سے آگاہ کیا۔ اجلاس کو ڈائریکٹر ہیلتھ ڈاکٹر رانا محمد ریاض نے بتایا کہ انسداد پولیو مہم کے دوران چاروں اضلاع میں 16 لاکھ 39ہزار 283 بچوں کو پولیو سے بچا? کے قطرے پلائے جائیں گے ،کمشنر کا کہنا تھا کہ پولیو کے خلاف موثر اور پائیدار اقدامات کی بدولت آئندہ نسلیں اس موذی مرض سے محفوظ رہ سکتی ہیں، لہذا انسداد پولیو مہم کو سو فیصد کامیابی سے ہمکنار کرنے کیلئے سرتوڑ کوششیں کی جائیں۔ انہوں نے کہاکہ پبلک ٹرانسپورٹ، اڈوں، ریلوے اسٹیشن سمیت دیگر اہم عوامی مقامات پر پولیو ٹیموں کی موجودگی یقینی بنائی جائے ، اس اہم ذمہ داری میں غفلت برداشت نہیں کی جائیگی۔اجلاس میں ڈپٹی کمشنر سرگودہا کیپٹن ریٹائرڈ محمد وسیم، ڈائریکٹر ہیلتھ سروسز ڈاکٹر رانا محمدریاض، سی ای او ہیلتھ ڈاکٹر سارہ صفدر اور ڈبلیو ایچ او کے نمائندوں کے علاوہ ڈپٹی کمشنر خوشاب فروا عامر، ڈپٹی کمشنر میانوالی خالد گورائیہ اور ڈپٹی کمشنر بھکر محمد اشرف کے علاوہ سی ای اوز نے ویڈیو لنک کے ذریعے شرکت کی۔
