ظفر مسعود پاکستان بینکس ایسوسی ایشن کے چیئرمین منتخب
کراچی: (دنیا نیوز) پاکستان بینکس ایسوسی ایشن نے ظفر مسعود کو چیئرمین منتخب کر لیا۔
پاکستان بینکس ایسوسی ایشن (PBA) نے 16 رکنی نئی ایگزیکٹو کمیٹی کا انتخاب اور اعلان کر دیا ہے، جس میں دو خواتین اراکین اور 8 نئے شامل ہونے والے رکن بینکس شامل ہیں۔
یہ اقدام سب کی شمولیت اور بینکاری شعبے کی وسیع نمائندگی کی جانب ایک اہم سٹریٹجک پیش رفت کی عکاسی کرتا ہے، انتخابات کے بعد ایگزیکٹو کمیٹی نے متفقہ طور پر بینک آف پنجاب کے صدر اور چیف ایگزیکٹو آفیسر، ظفر مسعود کو پاکستان بینکس ایسوسی ایشن کا چیئرمین منتخب کیا۔
اس موقع پر اظہار خیال کرتے ہوئے ظفر مسعود نے کہا کہ نئی تشکیل شدہ ایگزیکٹو کمیٹی ایسوسی ایشن کے طرز رہنمائی میں ایک اہم ارتقائی مرحلے کی نمائندگی کرتی ہے۔
انہوں نے کہا کہ توسیع شدہ اور متنوع رکنیت PBA کی اس صلاحیت کو مضبوط بناتی ہے کہ وہ قومی معاشی ایجنڈے کو آگے بڑھائے، جس میں ترجیحی شعبوں میں کریڈٹ گیپس کو کم کرنا، ڈیجیٹل ذرائع کے ذریعے مالی شمولیت کو فروغ دینا اور پاکستان کی پائیدار معاشی بحالی کی حمایت شامل ہے۔
نئی قیادت میں حبیب بینک لمیٹڈ کے صدر اور چیف ایگزیکٹو آفیسرناصر سلیم کو سینئر وائس چیئرمین جبکہ فیصل بینک لمیٹڈ کے صدر اور چیف ایگز یکٹو آفیسر یوسف حسین کو وائس چیئرمین مقرر کیا گیا ہے۔
ناصر سلیم نے عالمی معاشی دباؤ کے تناظر میں استحکام اور مضبوط کمپلائنس فریم ورک کی اہمیت پر زور دیا جبکہ یوسف حسین نے بینکاری شعبے کو جدت پسند اور علاقائی سطح پر مسابقتی رکھنے کے لیے جدیدیت ، ٹیکنالوجی کے استعمال اور ادارہ جاتی تیز رفتاری کو کلیدی ترجیحات قرار دیا۔
اس موقع پر تبصرہ کرتے ہوئے پاکستان بینکس ایسوسی ایشن کے چیف ایگزیکٹو آفیسر اورسیکرٹری جنرل، منیر کمال نے کہا کہ ایگزیکٹو کمیٹی کی توسیع خصوصاً خواتین کی تاریخی شمولیت، ایسوسی ایشن کے تنوع اور جدید طرز قیادت کے عزم کی عکاس ہے۔
نئی قیادت کے تحت، پاکستان پہینکس ایسوسی ایشن سٹیٹ بینک آف پاکستان، وزارت خزانہ اور وفاقی حکومت کے ساتھ تعاون کو مزید مضبوط بنانے کا ارادہ رکھتی ہے تاکہ انفراسٹرکچر کی ترقی، زراعت اور ایس ایم ایز کے لیے نجی شعبے کے قرضوں میں اضافہ، اور ملک کی ڈیجیٹل تبدیلی کے عمل کو آگے بڑھایا جا سکے۔
