پاکستان میں کھاد کی فروخت نے تاریخ رقم کردی
کراچی:(دنیا نیوز) پاکستان میں کھاد کی فروخت نے تاریخ رقم کر دی،نیشنل فرٹیلائزرڈیویلپمنٹ سینٹرنے ڈیٹا جاری کردیا ۔
این ایف ڈی سی کے اعداد وشمار کی رپورٹ کے مطابق پاکستان میں دسمبر25ء میں یوریا کی فروخت پہلی بار 13لاکھ 56 ہزار ٹن ریکارڈ کی گئی جس سے ملک بھر میں یوریا کی فروخت میں سالانہ 37 فیصد اور ماہانہ 65 فیصد اضافہ ہوا۔
رپورٹ میں بتایا گیا کہ نومبر 2025 میں یوریا کی فروخت میں 4 فیصد کمی ریکارڈ کی گئی تھی، دسمبر میں فاسفورس کھاد ڈی اے پی کی فروخت 8 لاکھ ٹن رہی، ڈی اے پی میں ماہانہ بنیاد پر 67 فیصد اور سالانہ بنیاد پر 42 فیصد اضافہ ہوا۔
ایس ایف ڈی سی کے اعداد وشمار کی رپورٹ میں یہ بھی لکھا گیا کہ اینگرو فرٹیلائزر نے دسمبر کے دوران یوریا پر400 روپے فی بیگ تک ڈسکاؤنٹ برقرار رکھا ،فوجی فرٹیلائزر نے بھی کھاد بیگ میں 150 سے 200 روپے کی رعایت دی۔
اِسی طرح دسمبر25ء کے اختتام پر ملکی سطح پر یوریا ذخیرہ کم ہوکر 3 لاکھ 15ہزار ٹن رہ گیا اور ڈی اے پی کا اختتامی ذخیرہ 2 لاکھ 19 ہزار ٹن رہا جب کہ زرعی طلب میں اضافہ ہوا، ربیع سیزن کی سر گرمیاں فرٹیلائزر ڈیمانڈ میں بے پناہ اضافہ کر گئیں۔
