پاکستان اور بنگلادیش ٹی 20 سیریز، آئندہ ہفتے شیڈول کا اعلان متوقع
لاہور: (ویب ڈیسک) پاکستان کے خلاف ٹی 20 سیریز کے لیے بنگلادیش کرکٹ بورڈ کی جانب سے آئندہ ہفتے شیڈول کا اعلان کیے جانے کا امکان ہے۔
ذرائع کے مطابق بنگلادیشی کرکٹ بورڈ (بی سی بی) پاکستان کرکٹ بورڈ کو 3 ٹی 20 میچز کا شیڈول بھجوا چکا ہے، مجوزہ شیڈول میں ٹی 20 میچز 20، 22 اور 24 جولائی کو ڈھاکا میں ہوں گے۔
ادھر پاکستان اور ویسٹ انڈیز بورڈز میں بھی سیریز کے معاملات کے لیے بات چیت جاری ہے، ویسٹ انڈیز کرکٹ بورڈ کو ون ڈے میچز کو ٹی 20 میچز میں تبدیل کرنے کی پی سی بی نے تجویز دی تھی۔
پاکستان اور ویسٹ انڈیز کے درمیان شیڈولڈ سیریز میں 3 ٹی 20 امریکا جبکہ 3 ون ڈے میچز ویسٹ انڈیز میں کھیلے جانے ہیں۔
ذرائع کے مطابق پی سی بی نے ٹی 20 ٹورنامنٹس کی وجہ سے ون ڈے کے بجائے ٹی 20 میچز کھیلنے کی بات کی تھی، پی سی بی پرامید ہے کہ ویسٹ انڈیز میچز تبدیل کرنے پر آمادگی ظاہر کرے گا۔
ون ڈے میچز تبدیل ہونے کے بعد ٹی 20 سیریز 5 یا 6 میچز پر مشتمل ہو گی، پاکستان ویسٹ انڈیز سیریز کا آغاز 31 جولائی سے شیڈولڈ ہے۔
