عارف علوی کو سرکاری رہائشگاہ کی فراہمی کی درخواست پر محکمہ داخلہ کا جواب جمع
کراچی: (دنیا نیوز) سابق صدر مملکت ڈاکٹر عارف علوی کو سرکاری رہائشگاہ کی فراہمی سے متعلق درخواست پر سٹیٹ ڈیپارٹمنٹ نے سندھ ہائیکورٹ میں جواب جمع کرا دیا۔
محکمہ داخلہ نے سندھ ہائی کورٹ میں جمع کرائے گئے اپنے جواب میں کہا کہ باتھ آئی لینڈ میں بنگلہ کسٹم افسر کو وفاقی حکومت کے افسر کے طور پر الاٹ کیا گیا تھا، بنگلے کی الاٹمنٹ سے متعلق عدالتی چارہ جوئی جاری ہے، عدالتی حکم امتناع کے باعث مجاز اتھارٹی کوئی بھی اقدام کرنے سے قاصر ہے۔
جواب میں سٹیٹ ڈیپارٹمنٹ نے کہا کہ عدالت جو بھی فیصلہ کرے گی اس کی ہدایت کے مطابق کارروائی کی جائے گی۔
محکمہ داخلہ نے عدالت میں مؤقف اپنایا کہ درخواست کا قانون کے مطابق فیصلہ کر دیا جائے۔
درخواست گزار کے وکیل بیرسٹر علی طاہر نے مؤقف اپنایا کہ ڈاکٹر عارف علوی بطور سابق صدر سرکاری رہائش گاہ کے اہل ہیں، سابق صدر کو باتھ آئی لینڈ میں جو بنگلہ الاٹ کیا تھا اسے خالی کرا کے قبضہ دلایا جائے۔
سندھ ہائی کورٹ نے درخواست گزار کو جواب الجواب کی مہلت دیتے ہوئے کیس کی مزید سماعت غیر معینہ مدت کیلئے ملتوی کر دی۔
