ایشیز کے تیسرے ٹیسٹ کیلئے آسٹریلوی سکواڈ کا اعلان، کپتان کمنز کی واپسی
ایڈیلیڈ: (دنیا نیوز) انگلینڈ کے خلاف ایشیز سیریز کے تیسرے ٹیسٹ کے لیے آسٹریلوی سکواڈ کا اعلان کردیا گیا، پیٹ کمنز سکواڈ میں واپسی کے ساتھ ہی ایڈیلیڈ ٹیسٹ میں کپتانی بھی کریں گے۔
کرکٹ آسٹریلیا کا کہنا ہے کہ کپتان پیٹ کمنز انجری سے ری کوری کے بعد سکواڈ میں واپس آئے ہیں جبکہ عثمان خواجہ 15 رکنی سکواڈ میں جگہ برقرار رکھنے میں کامیاب ہوئے ہیں۔
عثمان خواجہ پرتھ ٹیسٹ میں کمر کی تکلیف کا شکار ہوئے تھے جس کے بعد وہ برسبین ٹیسٹ نہیں کھیل سکے تھے، پیٹ کمنز جولائی کے بعد سے کرکٹ ایکشن سے باہر رہے ہیں، انہوں نے جولائی میں جمیکا میں ویسٹ انڈیز کے خلاف آخری ٹیسٹ کھیلا تھا۔
سکواڈ میں کپتان پیٹ کمنز، سکاٹ بولینڈ، ایلکس کیری، برینڈن ڈوگٹ اور کیمرون گرین کے علاوہ ٹریوس ہیڈ، جوش انگلس، عثمان خواجہ، مارنوس لبوشین، نیتھن لیوین، مائیکل نیسر، سٹیو سمتھ، مچل سٹارک، جیک ویدرالڈ اور بیو ویبسٹر شامل ہیں۔
یاد رہے کہ ایشیز سیریز کا تیسرا ٹیسٹ 17 دسمبر سے ایڈیلیڈ میں شروع ہو گا، پانچ ٹیسٹ میچز کی سیریز میں آسٹریلیا کو دو صفر سے برتری حاصل ہے۔
