اسحاق ڈار کا سعودی ہم منصب سے ٹیلیفونک رابطہ، علاقائی صورتحال پر تبادلہ خیال
اسلام آباد: (دنیا نیوز) نائب وزیراعظم اور وزیر خارجہ اسحاق ڈار نے اپنے سعودی ہم منصب سے ٹیلیفونک رابطے میں موجودہ علاقائی صورتحال اور حالیہ پیش رفت پر تبادلہ خیال کیا۔
پاکستان اور سعودی عرب کے تعلقات اسٹریٹجک عسکری تعاون، مشترکہ معاشی مفادات اور اسلامی رشتے پر مبنی ہیں۔ ان روابط میں معاشی امداد اور توانائی کی فراہمی شامل رہی ہے جبکہ ریاض اسلام آباد کے لیے مالی معاونت اور تیل کا ایک اہم ذریعہ رہا ہے۔
دفتر خارجہ کی سوشل میڈیا پوسٹ کے مطابق اسحاق ڈار نے بات چیت کے دوران اسلام آباد اور ریاض کے درمیان دوطرفہ تعلقات میں مثبت پیش رفت پر اطمینان کا اظہار کیا، جبکہ سعودی وزیر خارجہ شہزادہ فیصل بن فرحان نے تعلقات کو مزید مضبوط بنانے کے عزم کا اعادہ کیا۔
— Ministry of Foreign Affairs - Pakistan (@ForeignOfficePk) December 30, 2025
اسحاق ڈار نے نئے سال کی مناسبت سے نیک تمناؤں کا اظہار بھی کیا، جن کا شہزادہ فیصل بن فرحان نے گرم جوشی سے جواب دیا۔
اس سے قبل آج سعودی قیادت میں اتحاد نے یمن کی بندرگاہ مکالا پر جنوبی علیحدگی پسندوں کو بیرونی فوجی معاونت فراہم کیے جانے کے دعوے کے تحت حملہ کیا۔
دفتر خارجہ کے بیان کے مطابق پاکستان نے سعودی عرب کی سفارتی کوششوں کی حمایت کی اور متحدہ عرب امارات کی کاوشوں کو بھی سراہا۔
