پاکستان پہلی بار یوئیفا فٹبال ڈیولپمنٹ ٹورنامنٹ کا حصہ بن گیا
لاہور: (دنیا نیوز) پاکستان پہلی بار یوئیفا فٹبال ڈیولپمنٹ ٹورنامنٹ کا حصہ بن گیا۔
صدر پاکستان فٹبال فیڈریشن (پی ایف ایف) محسن گیلانی نے پاکستان فٹبال کو ایک اہم سنگِ میل قرار دیتے ہوئے کہا ہے کہ یوئیفا ڈیولپمنٹ ٹورنامنٹ میں شرکت نوجوان کھلاڑیوں کے لیے عالمی معیار کی فٹبال سیکھنے کا سنہری موقع ہے۔
محسن گیلانی کے مطابق یوئیفا فٹبال ڈیولپمنٹ ٹورنامنٹ 24 سے 30 اپریل تک قازقستان میں منعقد ہوگا جس میں میزبان قازقستان کے علاوہ روس اور آذربائیجان کی ٹیمیں بھی شریک ہوں گی، پاکستان انڈر 16 ٹیم پہلی بار یورپی فٹبال پلیٹ فارم پر اپنی صلاحیتوں کا مظاہرہ کرے گی۔
صدر پی ایف ایف کا کہنا تھا کہ یوتھ ڈیولپمنٹ پاکستان فٹبال فیڈریشن کی اولین ترجیح ہے، یوئیفا ٹورنامنٹ میں شرکت سے پاکستانی کھلاڑیوں کو عالمی معیار کی فٹبال، نظم و ضبط اور جدید تکنیک سیکھنے کا موقع ملے گا جو مستقبل میں قومی فٹبال کے لیے فائدہ مند ثابت ہوگا۔
