یو اے ای میں نمازعیدالفطر کی ادائیگی صرف مساجد کے اندر تک محدود
دبئی / ابوظہبی: (سید مدثر خوشنود) خطے میں بڑھتی کشیدگی کے پیش نظر متحدہ عرب امارات میں اس سال عیدالفطر کی نماز صرف مساجد کے اندر ادا کی جائے گی، جبکہ روایتی کھلے عیدگاہ اجتماعات اور اوپن ایئر نماز کے انتظامات معطل کر دیئے گئے ہیں۔
گلف نیوز کے مطابق یہ اعلان جنرل اتھارٹی آف اسلامک افیئرز، اوقاف اینڈ زکوٰۃ نے کیا ہے اور فیصلہ پورے ملک پر لاگو ہوگا۔
رپورٹ کے مطابق اتھارٹی نے واضح کیا کہ اس سال عید کی نماز روایتی کھلے مقامات کے بجائے ملک بھر کی مساجد میں ادا کی جائے گی، اس اقدام کا مقصد نماز کے انتظامات کو منظم رکھنا اور عوامی تحفظ کو یقینی بنانا ہے، جبکہ امارات کی مختلف مساجد نمازیوں کے استقبال کیلئے تیار ہیں۔
امارتی اخبار میں شائع بیان کے مطابق متعلقہ ادارے نے عوام سے کہا ہے کہ وہ صرف سرکاری ہدایات پر عمل کریں اور متعلقہ حکام کی جاری کردہ رہنمائی کو فالو کریں، اسی تناظر میں دیگر مقامی میڈیا رپورٹس میں بھی بتایا گیا کہ یہ اقدام اسلامی امور کے متعلقہ اداروں کے اشتراک سے نافذ کیا جا رہا ہے تاکہ عیدالفطر کی نماز محفوظ اور منظم ماحول میں ادا ہو سکے۔
یہ فیصلہ ایسے وقت میں سامنے آیا ہے جب عیدالفطر کے اجتماعات عموماً بڑے پیمانے پر کھلے مقامات پر ہوا کرتے ہیں، تاہم اس بار حکام نے مسجد-مرکوز انتظام کو ترجیح دی ہے۔
