صدر زرداری آج سے 9 جولائی تک کرغزستان کا سرکاری دورہ کریں گے
اسلام آباد: (دنیا نیوز) صدرِ مملکت آصف علی زرداری کرغزستان کا سرکاری دورہ کریں گے۔
ترجمان دفتر خارجہ کے مطابق صدر آصف علی زرداری کرغز صدر کی دعوت پر آج سے 9 جولائی تک کرغزستان کا سرکاری دورہ کریں گے، صدر مملکت اعلیٰ سطح وفد کی قیادت بھی کریں گے۔
دورے کے دوران صدرِ پاکستان کرغز صدر سے ون آن ون ملاقات بھی کریں گے، دونوں ممالک کے درمیان وفود کی سطح پر مذاکرات ہوں گے، باہمی دلچسپی کے علاقائی و عالمی امور پر تبادلۂ خیال ہوگا، تجارت و سرمایہ کاری، توانائی، کان کنی، زراعت، ٹیکسٹائل پر بات ہوگی۔
دفتر خارجہ کے مطابق حلال صنعت، صحت اور ادویہ سازی، ڈیجیٹل معیشت، تعلیم، سیاحت اور عوامی روابط سمیت مختلف شعبوں میں تعاون کے فروغ پر بات ہوگی، دورے کے دوران صدرِ پاکستان، کرغز پارلیمان کے سپیکر سے بھی ملاقات کریں گے۔
ترجمان کا کہنا تھا کہ یہ گزشتہ 21 برسوں میں کسی پاکستانی صدر کا کرغزستان کا پہلا دورہ ہوگا، دورہ دسمبر 2025 میں کرغز صدر کے کامیاب دورۂ پاکستان کے تسلسل میں ہو رہا ہے، دورہ دونوں ممالک کے درمیان اعلیٰ سطح روابط کے مسلسل فروغ کا عکاس ہے۔
