×

دنیا

روس اور یوکرین کے ایمرجنسی وارننگ سسٹمز پر سائبر حملے

بند کریں

ماسکو، کیف: (ویب ڈیسک) روس اور یوکرین کی ایمرجنسی الرٹ ایپس مبینہ طور پر ہیک ہو گئی ہیں۔

روس اور یوکرین دونوں نے کہا ہے کہ ان کے ہنگامی انتباہی نظاموں کو سائبر حملوں کا سامنا کرنا پڑا ہے، ماسکو میں روسی وزارتِ ہنگامی حالات نے کہا کہ اس کے الرٹ ایپ پر ہونے والا بڑے پیمانے کا سائبر اٹیک حملہ آوروں کو جعلی اطلاعات بھیجنے کے قابل بنا سکتا تھا۔

روسی وزارت ہنگامی حالات نے واضح کیا کہ عوامی انتباہی نظام معمول کے مطابق کام کر رہا ہے۔

یہ پیش رفت اس واقعہ کے فوراً بعد سامنے آئی ہے جب یوکرین کی فضائی حملوں سے آگاہ کرنے والی ایپ نے ایک بظاہر ہیکنگ کے بعد غلط انتباہات جاری کر دیے تھے۔

روس کی ایمرجنسی ایپ پر ایک جعلی پیغام بھیجا گیا جس میں دعویٰ کیا گیا کہ یوکرین نے روس کے تمام علاقوں کی طرف جوہری ہتھیاروں سے لیس ڈرون بھیج دیے ہیں، اس پیغام میں لوگوں کو کہا گیا کہ وہ تین ہفتوں کا کھانے پینے کا سامان جمع کریں اور محفوظ جگہوں پر چلے جائیں۔

دوسری جانب یوکرین کی فضائی خطرے سے خبردار کرنے والی ایپ پر بھی جعلی پیغامات نظر آئے، یوکرین کے حکام نے اس ہیکنگ کا الزام روس پر لگایا ہے اور شہریوں سے کہا ہے کہ ایپ میں آنے والے کسی بھی غیر معمولی یا مشکوک پیغام کو نظر انداز کریں۔

دونوں ممالک میں ان جعلی الرٹس نے لوگوں میں تشویش پیدا کر دی، لیکن حکام کا کہنا ہے کہ اصل ہنگامی انتباہی نظام بدستور کام کر رہا ہے۔

ادارے نے ان جعلی الرٹس کی تصاویر بھی جاری کیں جو یوکرین کی فضائی خطرے سے آگاہ کرنے والی ایپ پر ظاہر ہوئی تھیں۔