نیشنل سکیورٹی ورکشاپ بلوچستان کے وفد کا دورہ پشاور،گورنر اور کور کمانڈر سے ملاقات
پشاور: (دنیا نیوز) نیشنل سکیورٹی ورکشاپ بلوچستان کے شرکاء پر مشتمل وفد نے پشاور کا دورہ کیا جہاں انہوں نے گورنر خیبر پختونخوا اور کور کمانڈر پشاور سے ملاقاتیں کیں اور مختلف قومی و علاقائی امور پر تفصیلی بریفنگ حاصل کی۔
تفصیلات کے دوران دورے کے دوران شرکاء نے یادگارِ شہداء پر حاضری دی اور مادرِ وطن کے لیے جانوں کا نذرانہ پیش کرنے والے شہداء کے ایصالِ ثواب کے لیے فاتحہ خوانی کی، وفد نے شہداء کو زبردست خراجِ عقیدت پیش کرتے ہوئے ان کی قربانیوں کو قوم کا قیمتی اثاثہ قرار دیا۔
نیشنل سکیورٹی ورکشاپ کے شرکاء نے کور کمانڈر پشاور سے ملاقات کے دوران سوال و جواب پر مبنی ایک جامع سیشن میں شرکت کی، کور کمانڈر نے شرکاء کے سوالات کے مفصل اور جامع جوابات دیے اور انہیں صوبے میں امن و امان، انسدادِ دہشت گردی اور بارڈر مینجمنٹ سے متعلق کیے گئے مؤثر اقدامات سے آگاہ کیا۔
وفد نے گورنر ہاؤس پشاور کا بھی دورہ کیا جہاں گورنر خیبر پختونخوا سے مختلف قومی اور علاقائی امور پر تفصیلی گفتگو ہوئی، اس موقع پر باہمی ہم آہنگی، سلامتی کے چیلنجز اور ترقیاتی پہلوؤں پر تبادلہ خیال کیا گیا، دورے کے اختتام پر شرکاء نے قلعہ بالا حصار میوزیم کا بھی دورہ کیا جہاں انہیں پشاور کے تاریخی اور ثقافتی ورثے سے متعلق آگاہی فراہم کی گئی۔
نیشنل سکیورٹی ورکشاپ بلوچستان کے شرکاء کا کہنا تھا کہ افواجِ پاکستان اور فرنٹیئر کور ملک کی محافظ اور قومی سالمیت و ترقی کی ضامن ہیں، کور کمانڈر پشاور کے ساتھ منعقدہ سیشن میں بارڈر مینجمنٹ کے حقیقی مسائل اور درپیش چیلنجز سے متعلق تفصیلی آگاہی ملی جبکہ حقائق سے آگاہی کے لیے اس طرح کے سیشنز کا انعقاد ناگزیر ہے۔
