ٹک ٹاک اکاؤنٹ کی حفاظت کیلئے سکیورٹی چیک اپ کا فیچر متعارف
کیلیفورنیا: (ویب ڈیسک) شارٹ ویڈیو شیئرنگ ایپلی کیشن ٹک ٹاک نے اکاؤنٹ کی حفاظت کیلئے نیا سکیورٹی چیک اپ کا فیچر متعارف کرا دیا۔
ٹک ٹاک نے سکیورٹی چیک اپ کے نام سے نیا ڈیش بورڈ متعارف کرا دیا، جہاں تمام سکیورٹی فیچرز ایک ہی جگہ نظر آئیں گے، صارفین سیٹنگ اینڈ پرائیویسی کے آپشن میں جانے کے بعد سکیورٹی اینڈ پرمشن میں جا کر سکیورٹی چیک اپ کو استعمال کر سکیں گے۔
صارفین کے اکاؤنٹس کو زیادہ محفوظ کرنے اور کبھی اکاؤنٹ تک دوسری جگہ سے رسائی حاصل کرنے کیلئے سکیورٹی چیک اپ کو بہتر بنا دیا گیا ہے۔
سکیورٹی چیک اپ ڈیش بورڈ کے ذریعے صارفین اپنے اکاؤنٹ کو فون نمبر، ای میل اور بائیو میٹرک سے منسلک کر سکیں گے، اکاؤنٹ کو فیس لاک سے بھی منسلک کیا جا سکے گا، اسی طرح سکیورٹی چیک اپ کے ڈیش بورڈ پر صارفین کو اپنے پاس کی ورڈز بنانے اور ٹو فیکٹر اتھینٹیکیشن کے فیچرز تک بھی رسائی دی گئی ہے۔
اب ٹک ٹاک صارفین ایک ہی ڈیش بورڈ پر جا کر اپنے اکاؤنٹ کی سکیورٹی بڑھا سکیں گے، اس سے قبل مذکورہ تمام سکیورٹی فیچرز کو الگ الگ ڈیش بورڈز پر جاکر استعمال کرنا پڑتا تھا۔
نئے سکیورٹی چیک اپ سے قبل گزشتہ ہفتے ٹک ٹاک نے پیرنٹنگ کنٹرول کے نئے فیچرز بھی پیش کرتے ہوئے والدین کو اپنے کم عمر بچوں کے اکاؤنٹس پر نگرانی کرنے کے زیادہ اختیارات دیئے تھے۔
