×

ٹیکنالوجی

روس میں 5 جی سروس کا باضابطہ آغاز، ایک کروڑ شہریوں کو سہولت دستیاب

بند کریں

ماسکو: (شاہد گھمن) روس میں پانچویں نسل کی موبائل کمیونیکیشن سروس 5 جی کا باضابطہ آغاز کر دیا گیا، ابتدائی مرحلے میں ماسکو اور سینٹ پیٹرزبرگ سمیت 16 شہروں کے تقریباً ایک کروڑ شہریوں کو تیز رفتار موبائل انٹرنیٹ کی سہولت دستیاب ہوگی۔

روس کی وزارت ڈیجیٹل ترقی، مواصلات اور ذرائع ابلاغ کے مطابق ملک میں 5 جی سروس کا آغاز صدر ولادیمیر پوتن کی ہدایت پر کیا گیا ہے۔

وزارت نے بتایا کہ 5 جی ٹیکنالوجی صرف موبائل انٹرنیٹ کی رفتار بڑھانے کا ذریعہ نہیں بلکہ معیشت کی ڈیجیٹل تبدیلی کے لیے تیار کیا گیا ایک جامع نظام ہے۔

نئی ٹیکنالوجی کو خودکار گاڑیوں اور روبوٹک نظام کو کنٹرول کرنے، ٹیلی میڈیسن کو فروغ دینے، صنعتی شعبے کو ڈیجیٹل بنانے اور دیگر جدید منصوبوں کے لیے استعمال کیا جا سکے گا۔

ابتدائی مرحلے میں 5 جی سروس ان فریکوئنسیز پر شروع کی گئی ہے جو اس سے قبل موبائل آپریٹرز کو ایل ٹی ای معیار کے لیے فراہم کی گئی تھیں۔

ٹیلی کمیونیکیشن کمپنیوں کو پانچویں نسل کی موبائل سروس کے لیے 4.63 سے 4.99 گیگا ہرٹز کا فریکوئنسی بینڈ بھی فراہم کیا گیا ہے۔

وزارت ڈیجیٹل ترقی کے مطابق یہ فریکوئنسی بینڈ تمام متعلقہ کمپنیوں کو مساوی حصوں میں بلامعاوضہ دیا گیا ہے، اس فیصلے سے ٹیلی کمیونیکیشن کے شعبے میں مسابقت کی بلند سطح برقرار رکھنے اور صارفین کو مناسب نرخوں پر 5 جی سروس فراہم کرنے میں مدد ملے گی۔

ابتدائی مرحلے میں روس کے 16 شہروں میں 5 جی سروس شروع کی گئی ہے، ان شہروں میں ماسکو، تویر، سینٹ پیٹرزبرگ، نووسیبیرسک، یکاتیرنبرگ، قازان، سمارا، یاروسلاول، اوفا، وولگوگراد، کراسنویارسک، پرم، چیلیابنسک، ویلیکی نووگورود، نزنی نووگورود اور کراسنودار شامل ہیں۔

وزارت کے مطابق تیز رفتار پانچویں نسل کا موبائل انٹرنیٹ اس وقت تقریباً ایک کروڑ افراد کو دستیاب ہے۔

روس کی بڑی موبائل اور ٹیلی کمیونیکیشن کمپنیاں ایم ٹی ایس، میگافون، بی لائن اور ٹی ٹو صارفین کو 5 جی سروس فراہم کر رہی ہیں، تاہم تمام 16 شہروں میں ہر موبائل آپریٹر کی 5 جی سروس فی الحال دستیاب نہیں ہے۔

وزارت ڈیجیٹل ترقی نے بتایا کہ اینڈرائیڈ آپریٹنگ سسٹم پر مبنی موبائل فون استعمال کرنے والے تمام صارفین کو مستقبل قریب میں پانچویں نسل کے نیٹ ورک تک رسائی حاصل ہوجائے گی۔

آئی فون صارفین کے لیے روس میں 5 جی سروس کی دستیابی کا انحصار امریکی ٹیکنالوجی کمپنی ایپل کے فیصلے پر ہوگا۔

روس کی بڑی ٹیلی کمیونیکیشن کمپنیوں ایم ٹی ایس، بی لائن، میگافون اور ٹی ٹو کے سربراہان نے ملک میں 5 جی سروس کے آغاز کا خیرمقدم کرتے ہوئے نئی ٹیکنالوجی کے فوائد کو نمایاں کیا ہے۔

ایم ٹی ایس کی ڈائریکٹر جنرل انیسا گالاکتیونووا نے روس میں 5 جی سروس کے آغاز کو تاریخی واقعہ قرار دیا۔

انہوں نے کہا کہ لاکھوں افراد کو اعلیٰ معیار کی نئی ڈیجیٹل سہولتوں تک رسائی حاصل ہوگی جبکہ کاروباری ادارے اور مختلف تنظیمیں 5 جی ٹیکنالوجی کے فوائد پر مبنی جدید صنعتی حل استعمال کرسکیں گی۔

میگافون کے چیف ایگزیکٹو آفیسر خاچاتور پومبوخچیان نے کہا کہ 5 جی ٹیکنالوجی بڑے شہروں کے لیے تیز رفتار انٹرنیٹ فراہم کرنے کے ساتھ صنعتی شعبے کی ڈیجیٹل تبدیلی کی بنیاد بھی بنے گی۔

انہوں نے کہا کہ مواصلات کا نیا معیار روس میں ڈیجیٹل ٹیکنالوجی اور صنعتی ترقی کو بنیادی طور پر نئی رفتار فراہم کرے گا۔

ویمپل کام کے ڈائریکٹر جنرل اور بی لائن برانڈ کے سربراہ سرگئی انوخن نے کہا کہ 5 جی سروس کا آغاز ایک ایسا واقعہ ہے جس کا پوری ٹیلی کمیونیکیشن مارکیٹ اور صارفین طویل عرصے سے انتظار کر رہے تھے۔

سرگئی انوخن کے مطابق کمپنی مرحلہ وار 5 جی سروس متعارف کرانے کے لیے ایک طویل عرصے سے اپنے نیٹ ورک اور صارفین کے موبائل آلات کو تیار کر رہی تھی۔

ٹی ٹو کے ڈائریکٹر جنرل انتون گودوویکوف نے کہا کہ 5 جی سروس کے آغاز کے لیے ٹیلی کمیونیکیشن کی صنعت، متعلقہ سرکاری اداروں اور عوام نے بڑے پیمانے پر کوششیں کی ہیں۔

انہوں نے پانچویں نسل کے نیٹ ورک کے آغاز کے لیے منفرد حل تلاش کرنے پر روسی حکومت کا شکریہ بھی ادا کیا۔

روس کے وزیر برائے ڈیجیٹل ترقی، مواصلات اور ذرائع ابلاغ مکسوت شادایف اور نائب وزیراعظم اور حکومتی عملے کے سربراہ دیمتری گریگورینکو نے بھی ملک میں 5 جی سروس کے آغاز کو مثبت پیش رفت قرار دیا ہے۔

مکسوت شادایف نے کہا کہ پانچویں نسل کے موبائل نیٹ ورک موبائل سروسز کے لیے نمایاں طور پر زیادہ رفتار فراہم کرتے ہیں، جو بالخصوص شہری علاقوں میں جدید ڈیجیٹل سہولتیں استعمال کرنے والے صارفین کے لیے انتہائی اہم ہے۔

نائب وزیراعظم دیمتری گریگورینکو نے کہا کہ حکومت کا ہدف روس میں استعمال ہونے والے 5 جی بیس اسٹیشنوں میں مقامی طور پر تیار کیے گئے آلات کا حصہ بڑھا کر 100 فیصد تک پہنچانا ہے۔

انہوں نے کہا کہ مواصلاتی نیٹ ورکس کو ڈیجیٹل معیشت کی ترقی کے ساتھ ہم آہنگ رفتار سے آگے بڑھنا چاہیے اور صارفین کو زیادہ رفتار کے ساتھ قابل اعتماد رابطے کی سہولت فراہم کرنی چاہیے۔