غزہ: اسرائیل کا اقوام متحدہ کے ہیڈ کوارٹر پر حملہ، غیر ملکی اہلکار ہلاک، 5 زخمی
غزہ: (دنیا نیوز) غزہ کے علاقے دیر البلح میں اقوام متحدہ کے ہیڈ کوارٹر پر اسرائیلی حملے کے نتیجے میں اقوام متحدہ کا ایک غیر ملکی اہلکار ہلاک اور 5 دیگر افراد شدید زخمی ہوگئے۔
عرب میڈیا رپورٹس کے مطابق غزہ کی وزارت صحت کے جاری کردہ بیان کے مطابق زخمیوں کو دیر البلح کے شہدائے الاقصیٰ اسپتال منتقل کردیا گیا جہاں ایک زخمی دم توڑ گیا۔
اسرائیلی فوج نے دیر البلح میں اقوام متحدہ کی کسی بھی عمارت پر حملے کے الزامات کو مسترد کرتے ہوئے اپنے بیان میں کہا کہ میڈیا ادارے غیر مصدقہ رپورٹس پر ذمہ داری کا مظاہرہ کریں۔
عرب میڈیا اور غیر ملکی خبررساں ایجنسی کی جانب سے فراہم کی گئی تصاویر اور ویڈیو میں زخمی غیر ملکیوں کو اقوام متحدہ کی گاڑی اور ایمبولینس میں اسپتال لائے جانے کے مناظر دیکھے جاسکتے ہیں۔
غزہ کے سرکاری دفتر کی جانب سے بیان میں اسرائیلی حملے کی شدید مذمت کرتے ہوئے اسے فلسطینی عوام کی مدد سے روکنے کے لیے اقوام متحدہ اور دیگر امدادی اداروں کو نشانہ بنانے کی ایک منظم پالیسی قرار دیا ہے۔
کہا گیا کہ ہم اقوام متحدہ سے مطالبہ کرتے ہیں کہ وہ اس جرم پر واضح اور سخت مؤقف اختیار کرے اور فوری اقدامات کرتے ہوئے اسرائیل کو جوابدہ ٹھہرائے۔
