ایک اور پاکستانی برطانوی ہاؤس آف لارڈز کا رکن منتخب
لندن(مانیٹرنگ ڈیسک)برطانوی ایوان بالا یعنی ہاؤس آف لارڈز میں ایک اور پاکستانی پہنچ گیا ۔لبرل ڈیموکریٹس کی نامزدگی پر لارڈ بننے والے شفیق محمد نے۔۔۔
قرآن پر حلف اٹھانے کے بعد پاکستان کے نجی نیوز چینل کو انٹرویو دیتے ہوئے کہا باپ دادا مزدور تھے ، ہاؤس آف لارڈ تک پہنچنے کا سفر طویل اور محنت سے عبارت ہے ، شیفیلڈ میں 20 برس کونسل گروپ لیڈر اور یورپی پارلیمنٹ میں بھی خدمات سرانجام دیں، کبھی سوچا بھی نہیں تھا کہ لارڈ بنوں گا۔لارڈ شفیق محمد نے بتایا کہ انہوں نے پاکستان میں چکسواری کے علاقے میں مٹی سے بنے گھر میں آنکھ کھولی،گھر میں پانی اور بجلی نہیں تھی، والدہ کنویں سے پانی بھر کر لاتی تھیں۔ان کا کہنا تھا کہ برطانیہ مواقع کا ملک ہے ، میں اس کی زندہ مثال ہوں، نوجوانوں کے لیے پیغام ہے کہ خواہ ان کا تعلق کہیں سے بھی ہے وہ اپنی محنت سے مقام حاصل کرسکتے ہیں۔لارڈ شفیق نے کہا کہ گرومنگ میں صرف چند لوگ ملوث ہیں جنہوں نے پوری کمیونٹی کو بدنام کیا ہے ،کمیونٹی میں موجود گندے انڈوں کا دفاع نہ کیا جائے ، ہمارے بزرگ تو خواتین کو دیکھ کر آنکھیں جھکا لیا کرتے تھے ۔انہوں نے مزید کہا کہ میں بطور لارڈ کشمیر اور لوکل کمیونٹی کے دیگر مسائل کو حل کرنے کی کوشش کروں گا۔
