ٹائی ٹینک کے بچ جانیوالے مسافر کا خط 11کروڑ میں فروخت
لندن (دنیا مانیٹرنگ ڈیسک)انگلستان کا بدنصیب بحری جہاز ٹائی ٹینک 15 اپریل 1912 کو بحر اوقیانوس میں ڈوبا تاہم بچنے والوں میں سے ایک معروف مسافر کا تحریر کردہ خط گزشتہ روز نیلامی کے دوران 3 لاکھ 99 ہزار ڈالر (11 کروڑ پاکستانی روپے سے زائد)میں فروخت ہوا۔
اس خط کو آکشن ہاؤس ہنری الڈیریج اینڈ سن نے میوزیم گریڈ قرار دیا اور یہ امریکا کے ایک پرائیویٹ کلکٹر (نادر و نایاب اشیا جمع کرنیوالا)سے ملا اور اسے انتہائی مسابقتی بولی کے بعد ہفتہ کو خریدا گیا۔یہ خط فرسٹ کلاس کے مسافر کرنل آرچی بالڈ گریس نے ٹائی ٹینک کی شمالی بحر اوقیانوس میں غرقابی سے دو روز قبل تحریر کیا اور اسے کورک آئر لینڈ سے میل کیا تھا۔ کرنل آرچی اس وقت 54 برس کے تھے ، وہ ڈوبنے سے تو بچ گئے لیکن جان بچانے کیلئے برفانی پانی میں کودنے اور کافی دیر اس میں رہنے کی وجہ سے بیمار رہنے لگے تھے اور اسی کیفیت میں مبتلا رہتے ہوئے 8 ماہ بعد انتقال کرگئے ۔
