بھارتی اینکرز نے جنگی جذبات کو ہوا دینے میں خطرناک کردار ادا کیا :امریکی اخبار
نیویارک(آن لائن)امریکی میڈیا نے بھارتی میڈیا کے جھوٹے پراپیگنڈے کو بے نقاب کرتے ہوئے کہا ہے کہ پاک بھارت کشیدگی کے دوران بھارتی میڈیا نے جان بوجھ کر جعلی خبریں پھیلائیں اور مصنوعی ذہانت کے ذریعے ویڈیوز میں رد و بدل کر کے عوام کو گمراہ کیا۔
پاکستان کیخلاف گودی میڈیا کی جھوٹی میڈیا مہم پر بین الاقوامی ہزیمت کا سلسلہ جاری ہے ۔ امریکی اخبار نیویارک ٹائمز کی رپورٹ کے مطابق بھارتی میڈیا نے یہ دعویٰ کیا کہ بھارتی افواج نے پاکستان کی جوہری تنصیبات کو نشانہ بنایا، کراچی بندرگاہ کو تباہ کیا اور پاکستانی فضائیہ کے دو جنگی طیارے مار گرائے تاہم ان میں سے کسی بھی دعوے کی نہ تو کوئی آزاد تصدیق ہو سکی اور نہ ہی کوئی ثبوت پیش کیا گیا۔اخبار نے انکشاف کیا کہ بھارتی ٹی وی چینلز "آج تک" اور "نیوز 18" نے ان جھوٹے بیانیوں کو بڑھا چڑھا کر پیش کیا جبکہ فیکٹ چیکنگ ویب سائٹ آلٹ نیوزنے ثابت کیا کہ کئی ویڈیوز، نقشے اور دعوے سراسر جھوٹ پر مبنی تھے ۔ بھارتی اینکرز اور مبصرین نے جنگی جذبات کو ہوا دینے میں خطرناک کردار ادا کیا اور ایک ایٹمی خطے میں غیر ضروری اشتعال پیدا کیا۔ بھارتی میڈیا کی یہ روش نہ صرف پیشہ ورانہ صحافت کی خلاف ورزی ہے بلکہ علاقائی امن و سلامتی کیلئے خطرناک ہے ۔دفاعی ماہرین نے خبردار کیا ہے کہ جھوٹی خبروں کا یہ سیلاب بھارت کی بین الاقوامی ساکھ کو ناقابل تلافی نقصان پہنچا رہا ہے اور اس سے نیوکلیئر اسکیلیشن جیسا سنگین خطرہ بھی پیدا ہو سکتا ہے ۔سیاسی ماہرین کے مطابق مودی سرکار میں بھارت میں صحافت دباؤ کا شکار ہے اور حکومت کی جانب سے غیر ملکی صحافتی اداروں پر بھی دبا ؤبڑھتا جا رہا ہے ، جس پر بین الاقوامی سطح پر تنقید میں اضافہ ہوگیا ہے ۔
