سٹوڈیو سے ڈیل، ہالی ووڈ رائٹرز کا ہڑتال ختم کرنے کا فیصلہ
لاس اینجلس(شوبز ڈیسک)سٹوڈیو سے ڈیل کے بعد ہالی ووڈ رائٹرز نے 5 ماہ سے جاری ہڑتال ختم کرنے کا فیصلہ کرلیا۔
برطانوی خبر رساں ادارے کے مطابق ہالی ووڈ رائٹرز کا واک آؤٹ 2 مئی کو شروع ہوا جس میں سکرین ایکٹرز گلڈ (ایس اے جی) کے اراکین نے بھی 13 جولائی سے ہڑتال میں حصہ لیا جب کہ نامور ہالی ووڈ اداکار بھی رائٹرز کی اس ہڑتال میں ان کے ساتھ شریک ہوئے تھے ۔ ہڑتال کو دہائیوں میں ہالی ووڈ کو متاثر کرنے والی سب سے طویل ہڑتال کہا گیا تھا، یہ ہڑتال تنخواہ اور صنعت میں مصنوعی ذہانت کے استعمال کے خلاف کی جارہی تھی۔ ہڑتال سے امریکا کے مشہور ٹی وی پروگرام بند ہوگئے تھے جس کی وجہ سے امریکا کو 5 بلین ڈالرز کا نقصان ہوا ہے ، ان ٹی وی پروگرامز میں یلو جیکٹ، بلینز، سٹرینجز تھنگز جیسے مشہور و مقبول ٹی وی شو شامل ہیں۔میڈیا رپورٹس کے مطابق رائٹرز کی جانب سے ہڑتال ختم کردی گئی ہے لیکن اداکار تاحال ہڑتال پر ہیں۔
