بھارت سے پراجیکٹس کی آفرز موصول ہو رہیں : فیروز خان
لاہور(شوبزڈیسک)شوبز انڈسٹری کے اداکار، گلوکار و یوٹیوبر فیروز خان نے انکشاف کیا ہے کہ انہیں بھارت سے متعدد پراجیکٹس کی پیشکش موصول ہوئی ہیں۔
فیروز خان کی سوشل میڈیا پر ایک مختصر سی ویڈیو وائرل ہوئی ہے، یہ ویڈیو ان کے گزشتہ دنوں لندن کے دورے کی ہے ۔ویڈیو میں فیروز خان ڈرامہ سیریل ‘خدا اور محبت’ سے متعلق بات کرتے ہوئے کہہ رہے ہیں کہ ریلیز سے قبل ہی میں مطمئن اور پراعتماد تھا کہ یہ ڈرامہ ہٹ ثابت ہو گا، یہ ڈرامہ پاکستان ڈرامہ انڈسٹری کے لیے تاریخی ڈرامہ ہو گا۔میں آنے والے وقت میں مزید کرداروں اور پراجیکٹس کے لیے بہت پرامید اور پرجوش ہوں۔ میں نے حال ہی میں ایک بھارتی فلم کی لندن میں شوٹنگ ختم کی ہے ، اس بات کو ایک سال ہو گیا ہے ، مجھے بھارت اور بین الاقوامی پلیٹ فارمز سے مزید پراجیکٹس کی آفرز آ رہی ہیں۔ میں ہمیشہ سے دو ملکوں کے درمیان پُل کا کردار ادا کرنے کے لیے تیار رہا ہوں، میں سرحدوں کے اس پار کام کرنے کے لیے تیار ہوں۔
