افتخار ٹھاکر کا خود سے ناراض بھارتی پنجابی سٹارز کو پیغام
لاہور(شوبزڈیسک)معروف مزاحیہ اداکار اور ہدایتکار افتخار ٹھاکر نے پاکستان کے دفاع سے متعلق ایک سخت بیان دیا جس پر بھارتی پنجابی فنکاروں کی جانب سے شدید ردِعمل سامنے آیا۔۔۔
تو افتخار ٹھاکر نے نہ صرف اپنے موقف کا دفاع کیا بلکہ بھارتی پنجابی فنکاروں سے اظہار افسوس کرتے ہوئے کہا کہ دنیا میں دو طرح کے لوگ ہوتے ہیں وہ جو اپنی بہادر ماں کا دودھ پی کر بڑے ہوئے ہیں، وہ غصہ بھی کرتے ہیں تو عزت کے دائرے میں اور دوسرے وہ جو بدتمیزی اور گھٹیا زبان کا استعمال کرتے ہیں۔انہوں نے سِمی چوہل، دلجیت دوسانج، امرندر گِل وغیرہ سے معذرت کا اظہار کیا اور کہا کہ ان کی دل آزاری ان کی نیت نہیں تھی۔ یہ سب میرے دوست ہیں اور مجھے عزت دیتے ہیں، میں اس عزت کو یاد رکھوں گا۔ افتخار ٹھاکر نے واضح کیا کہ ان کے الفاظ کا ہدف بھارتی فوجی تجزیہ کار میجر گورو آریہ اور جنرل بخشی جیسے لوگ ہیں جو جنگ کو بڑھاوا دیتے ہیں۔ ان کا کہنا تھا کہ میں بھارتی پنجاب کو کبھی پاکستانی پنجاب سے الگ نہیں سمجھتا، ہم ایک روح کے دو جسم ہیں۔ واضح رہے کہ افتخار ٹھاکر نے کہا تھا کہ اگر تم ہوا کے ذریعے آ گئے تو بکھر جاؤ گے، پانی کے راستے آگئے تو ڈوب جاؤ گے، اور زمین سے آگئے تو دفن کر دیئے جا گے۔ یہ بیان پاک فضائیہ کی بہادری کو سراہتے ہوئے دیا گیا تھا۔
