تحریک عدم اعتماد، تاریخوں کا تعین آج پی ڈی ایم اجلاس میں ہو گا
اسلام آباد (طارق عزیز)وزیراعظم عمران خان ، چیئرمین سینیٹ ، سپیکر قومی اسمبلی، ڈپٹی چیئرمین سینیٹ اور ڈپٹی سپیکر قومی اسمبلی کے خلاف تحریک عدم اعتماد کیلئے حتمی تاریخوں کا تعین آج پی ڈی ایم سربراہی اجلاس میں کیا جائیگا ۔
قوی امکان ہے کہ تحریک عدم اعتماد کا آغاز سپیکر قومی اسمبلی اسد قیصر سے کیا جائے گا جبکہ دوسرے مرحلہ پر چیئرمین سینیٹ کو ہٹایا جائے ۔ فائنل راؤنڈ وزیراعظم عمران خان کے خلاف ہوگا ،ان ہاؤس تبدیلی کی صورت میں نئے وزیراعظم کے نام پر اپوزیشن اتحاد میں غور جاری ہے ۔ قائد (ن) لیگ نوازشریف اور مولانا فضل الرحمن نے ان ہاؤس تبدیلی کیلئے مشروط رضا مندی ظاہر کرتے ہوئے کہا ہے کہ نیا سیٹ اپ تین سے 6 ماہ کیلئے ہونا چاہئے تاکہ ان ہاؤس تبدیلی کی صورت میں نیا وزیراعظم 6 ماہ بعد شفاف انتخابات کرانے کا پابند ہوگا ۔
رپورٹ کے مطابق حکومت کے خلاف لانگ مارچ کا آپشن وقتی طور پر پس منظر میں چلاگیا ۔ آج کے اجلاس میں یہ طے کیا جائے گا کہ اپوزیشن جماعتوں کا نمائندہ وفد وزیراعظم کے خلاف فارن فنڈنگ کیس کے سلسلہ میں چیف الیکشن کمشنر سے ملاقات کرے گا ۔ ملاقات میں ای وی ایم کے ذریعے ووٹنگ کے بارے میں اپنے تحفظات سے بھی آگاہ کرے گا ۔27 مارچ کو پنجاب ، اسلام آباد ، کے پی کے باقی ماندہ اضلاع میں بلدیاتی الیکشن کے پیش نظر 23 مارچ کی تاریخ تبدیل کرنے پر بھی غور ہوگا ۔
