ڈرہے سری نگر کے بعد مظفر آباد ،گلگت بھی ہاتھ سے نہ نکل جائے :سراج الحق
اسلام آباد (اپنے رپورٹرسے ،این این آئی)امیر جماعت اسلامی سراج الحق نے کہا کہ ڈرہے ان حکمرانوں کے ہوتے ہو ئے سری نگرکے بعد مظفرآباد اور گلگت بلتستان بھی ہاتھ سے نہ نکل جائے ۔
آبپارہ میں یکجہتی کشمیر ریلی سے خطاب کرتے ہوئے سراج الحق نے کہاکہ کشمیر کی آزادی تک جدوجہد جاری رکھنے کا عزم آج پوری قوم نے دہرایا، مظلوم کشمیری 200 سال سے آزادی کے لئے تڑپ ر ہے ہیں ، انگریز نے کشمیری قوم کو گلاب سنگھ کے ہا تھ فروخت کیا۔ روزانہ اوسطاً 3 کشمیری نوجوان شہید ہو رہے ہیں، اب تک دو لاکھ کشمیری شہید ہو چکے ، مقبوضہ کشمیر دنیا کا سب سے بڑا قید خانہ ہے ، کشمیر کے چھوٹے سے خطے میں 9 لاکھ سے زیادہ بھارتی فوج موجود ہے ، کشمیر میں نوجوان ماؤں کے سامنے قتل اور نوجوانوں کے سامنے ماؤں بہنوں کی عصمت دری کی گئی، کشمیری بزرگوں نے اپنے بچوں کو آزادی، شہادت اور جہاد کا درس دیا ہے ۔ حکومتوں کے پاس کشمیر کی آزادی کے لئے کوئی منصوبہ نہیں ہے ، اقوام متحدہ اور سلامتی کونسل کی کشمیرکے حق میں قراردادوں پر سب اندھے گونگے بہرے ہیں، پاکستان کے حکمرانوں نے اپنا فرض اور حق ادا نہیں کیا ۔ پاکستان کی فوج بہادر اور دلیر ہے ، اگر کشمیریوں نے جدوجہد ترک کر دی تو پاکستان کو پانی کا ایک قطرہ نہیں ملے گا، شہباز شریف،عمران خان اور آصف زرداری نے پاکستانیوں اور کشمیریوں کے ساتھ ظلم کیا، ان سیاسی حکمرانوں نے پاکستان کی غیرت مند قوم کو ایک دوسرے کے مقابل لا کھڑا کر کے ہمیں ورلڈ بینک کا غلام بنا دیا ، ریلی سے نائب امیر جماعت اسلامی میاں محمد اسلم، امیر جماعت اسلامی پنجاب شمالی ڈاکٹر طارق سلیم، امیر جماعت اسلامی اسلام آباد نصراللہ رندھاوا، امیر جماعت اسلامی راولپنڈی عارف شیرازی، صدر جے آئی یوتھ پنجاب اویس اسلم مرزا اور مرکزی انجمن تاجران کے صدر چودھری کاشف نے بھی خطاب کیا ۔سراج الحق نے کہا کہ مودی قصائی اور گجراتیوں کا قاتل ہے ، حکومت کو چا ہئے کہ کشمیر پر الگ نمائندہ مشن تعینات کرے اور کشمیر پر موقف سے پیچھے نہ ہٹے ورنہ قوم کبھی معاف نہیں کریگی ۔
