سیاسی جماعتیں سمجھ لیں اب بیان بازی سے کام نہیں چلے گا :شجاعت
لاہور(سیاسی رپورٹرسے )پاکستان مسلم لیگ کے صدر شجاعت حسین سے لاہور کے جنرل سیکرٹری محمد ندیم پہلوان نے ان کی رہائشگاہ پر ملاقات کی جس میں ملک کی مجموعی سیاسی صورتحال ، آئندہ عام انتخابات میں ممکنہ سیٹ ایڈ جسٹمنٹ اور انتخابی مہم کی سر گرمیوں کے حوالے سے تفصیلی تبادلہ خیال کیا گیا ۔
چودھری شجاعت حسین نے کہا کہ سیاسی جماعتیں اچھی طرح سمجھ لیں اب
صرف بیان بازی سے کام نہیں چلے گا بلکہ ملک کیلئے ڈلیور کرنا ہوگا ۔پاکستان مسلم لیگ شروع دن سے اس بات کی حامی ہے کہ ملک میں مفاہمت کو فروغ دیا جانا چاہیے اور اس روایت کو پروان چڑھانے کے لئے اپنا کردار بھی ادا کیا ہے ، آج ہمارے معاشرے کو رواداری کی اشد ضرورت ہے اور اس کیلئے سیاسی قیادت کو اپنا کردار ادا کرنا چاہیے ۔ انہوں نے کہا کہ مسلم لیگ کی سیاست کا محور عوام ہیں اس لئے سیاسی فیصلوں میں ہمیشہ اسے پیش نظر رکھا ہے ۔ آئندہ عام انتخابات میں پاکستان مسلم لیگ اپنی سیاسی حیثیت کو بر قرار رکھتے ہوئے کسی بھی طرح کے اتحاد کا فیصلہ کرے گی اور اس کیلئے مشاورت کا عمل جاری ہے ۔ انہوں نے کہا کہ سیاسی جماعتیں اچھی طرح سمجھ لیں اب صرف بیان بازی سے کام نہیں چلے گا بلکہ ملک کیلئے ڈلیور کرنا ہوگا ۔ محمد ندیم پہلوان نے پارٹی سربراہ کو تنظیمی امور کے حوالے سے آگاہ کرتے ہوئے کہا کہ پاکستان مسلم لیگ کے کارکن قیادت کے فیصلے پر لبیک کہیں گے ، ہمارے کارکن پرجوش ہیں اور جیسے ہی قیادت کی جانب سے حتمی فیصلے سامنے آئیں گے اس کے مطابق سیاسی سر گرمیوں میں تیزی لائی جائے گی۔
