اسلامی یونیورسٹی بد انتظامیاں، چیف جسٹس کی تحقیقات کی سفارش
اسلام آباد(سپیشل رپورٹر)چیف جسٹس پاکستان جسٹس قاضی فائز عیسیٰ نے انٹرنیشنل اسلامک یونیورسٹی میں مبینہ بد انتظامیوں کی تحقیقات کی سفارش کردی۔
چیف جسٹس نے صدر مملکت، چیئرمین ایچ ای سی اور وفاقی وزارت تعلیم کے نام مراسلہ میں یونیورسٹی کے انتظامی معاملات پر تحفظات کا اظہار کیا۔ خط کی نقل چیف جسٹس شریعت کورٹ اور یونیورسٹی کی انتظامیہ کو بھی ارسال کی گئی جس میں کہا گیا اسلا می یونیورسٹی بدانتظامی کی وجہ سے بین الاقوامی معیار کھو چکی، اسلامی اقدار ختم ہو گئیں۔ میری درخواست پر 3سال بعد صدر نے 30 نومبر کو بورڈ ممبرز کا اجلاس بلانے کا کہا۔ وائس پریذیڈنٹ نبی بخش جمانی نے میرے دو خطوط کا جواب تک نہیں دیا، یہ غماز ہے کہ وہ غلط کاریوں کی پردہ پوشی چاہتے ہیں، ان کی تعیناتی 3سال کیلئے تھی مگر تاحال عہدہ پر براجمان ہیں۔ بورڈ آف ٹرسٹیز اجلاس بلا کر یونیورسٹی کے انتظامی معاملات کا جائزہ لیں، وائس پریذیڈنٹ کی تعیناتی اور میرے خطوط بھی سامنے رکھے جائیں۔
