نوازشریف کیخلاف غلط فیصلے عدلیہ کے ماتھے پر داغ :رانا ثنا

نوازشریف کیخلاف غلط فیصلے عدلیہ کے ماتھے پر داغ :رانا ثنا

لاہور (دنیا نیوز،این این آئی)مسلم لیگ ن پنجاب کے صدر و سابق وفاقی وزیر رانا ثنا اللہ نے کہا ہے کہ ماضی میں نواز شریف کے خلاف فیصلے غلط تھے جو عدلیہ کے ماتھے پر بھی داغ ہیں،نواز شریف کو 7 سال بعد ایون فیلڈ ریفرنس میں انصاف ملا، اللہ نے انہیں سرخرو کیا۔

 العزیزیہ ریفرنس بھی فراڈ ہے جس میں جج ارشد ملک مرحوم کیخلاف فیصلہ آ چکا ،العزیزیہ کا فیصلہ برقرار نہیں رہنا چاہیے ،انتہائی نڈر چیف جسٹس قاضی فائز عیسیٰ نے جس طرح سب کو اعتماد میں لے کر الیکشن کی تاریخ کا اعلان کیا اس کے بعد التوا کی باتیں ہونا افسوسناک ہے ۔ماڈل ٹاؤن میں پریس کانفرنس کرتے ہوئے رانا ثنا اللہ نے مزیدکہا کہ ازخود نوٹس کے تحت العزیزیہ ریفرنس مکمل ختم ہو جانا چاہیے ، ماضی کے غلط فیصلوں کو جتنی جلدی ختم کر دیا جائے وہ عدلیہ کے لیے باعث عزت ہو گا، میرے خیال سے العزیزیہ کیس 2 دن میں ختم ہو جائے گا، عدالتوں نے فیصلہ قانون کے مطابق کرنا ہے عدالتی تشریح کے مطابق نہیں کرنا اور قانون اس وقت موجود ہے ، یہ چیلنج نہیں ہوا کہ تاحیات نااہلی نہیں ہو گی بلکہ 5 سال کے لئے ہو گی، 62 ون ایف کے تحت عدالتی تشریح کے بعد پارلیمان نیا قانون بنا چکی جس کو کہیں چیلنج نہیں کیا گیا۔لیگی رہنما نے کہا کہ چیئرمین پی ٹی آئی کیساتھ آج جو کچھ بھی ہو رہا وہ مکافات عمل ہے ، جس فیصلے کے تحت نواز شریف کو پارٹی صدارت سے الگ کیا گیا آج وہی فیصلہ چیئرمین پی ٹی آئی کے آڑے آ رہا ، یہ اللہ کا انصاف ہے ۔رانا ثنا اللہ نے کہا کہ ہم نے آج پارلیمانی بورڈ کی میٹنگز کے متعلق لائحہ عمل طے کر لیا ، نواز شریف ہر ڈویژن کے پارلیمانی بورڈ کے اجلاس میں ہر امیدوار سے خود ملاقات کرینگے اورپھرامیدواروں کے ناموں کا اعلان کر دیا جائے گا۔

روزنامہ دنیا ایپ انسٹال کریں