پی ٹی آئی سڑکوں کو چھوڑ کر ایوانوں میں آئے :احسن اقبال
نارووال (خبر نگار)وفاقی وزیر پلاننگ اینڈڈویلپمنٹ احسن اقبال نے کہاہے کہ پاکستان کی معیشت درست سمت کی طرف گامزن ہے ،سٹاک مارکیٹ 76ہزار انڈکس کراس کر گئی ۔
یونیورسٹی آف نارووال میں طلباوطالبات کو لیپ ٹاپ تقسیم کے موقع پر میڈیا سے بات کرتے ہوئے انہوں نے کہا بیرونی و اندرونی سرمایہ کاروں کو حکومت کی پالیسیوں پر بھرپور اعتماد ہے اگلے پانچ برسوں میں معاشی بحالی کے سفر کو محاذ آرائی کی سیاست سے بچائیں گے ، پی ٹی آئی قیادت کو مشورہ دیتا ہوں کہ سڑکوں کو چھوڑ کر ایوانوں میں آئیں تاکہ مثبت اپوزیشن کا کردار ادا کر سکیں ،خیبر پختونخوا میں پی ٹی آئی کی حکومت ہے وہ وہاں عوام کی خدمت کرے جس کوجہاں مینڈیٹ ملا وہاں عوام کی خدمت کریں ۔احسن اقبال نے کہا اب جلسوں کا کھیل نہیں کھیلنا ہمیں عوام کی خدمت کا مقابلہ کرنا ہے ہمارے دروازے بامقصد مذاکرات کے لئے تمام جماعتوں کے لئے کھلے ہیں لیکن بامقصد مذاکرات تبھی ہوسکتے ہیں جب فریق کھلے دل سے مثبت ایجنڈے کے ساتھ مذاکرات کر یں ، نہ کہ ضد کریں ورنہ مذاکرات کامیاب نہیں ہو ں گے ۔احسن اقبال نے کہا 9 مئی کے واقعات کو قوم کبھی معاف نہیں کر سکتی پی ٹی آئی سیاست میں مات کھانے کے بعد عدالت کا کندھا استعمال کررہی ہے ،وہ عدلیہ کو اسٹیبلشمنٹ اور حکومت سے لڑوا کر اپنے لئے راستہ بنانا چاہتی ہے ،عدلیہ بہت جہاں دیدہ ہے اور میچور ہے ، ملک کے تمام ستون سمجھتے ہیں ہم سب کو مل کر پاکستان کے لئے کام کرنا ہے ۔
