ایکنک:296ارب کے فلڈر یسپانس ایمرجنسی ہاؤسنگ سمیت19منصوبے منظور
اسلام آباد (دنیا نیوز، این این آئی)قومی اقتصادی کونسل کی ایگزیکٹو کمیٹی (ایکنک)نے 19 منصوبوں کی منظوری دیدی۔ ایکنک کا اجلاس وزیراعظم ہا ئوس میں ہوا ۔
وزیراعظم کی مصروفیات کے باعث اجلاس کی صدارت نائب وزیراعظم اور وزیر خارجہ سینیٹر محمد اسحاق ڈار نے کی، فورم نے چار سو ملین ڈالر ورلڈ بینک کے فنڈ سے انٹیگریٹڈ فلڈ ریسیلینس اینڈ ایڈاپٹیشن پروگرام (IFRAP)کے چارذیلی اجزا کی منظوری دی، اس میں ایک سو پچپن ملین ڈالر مکانات کی تعمیر نو اور بحالی کا ذیلی حصہ،پچاس ملین ڈالر سڑک کے بنیادی ڈھانچے کا ذیلی حصہ، چالیس ملین ڈالر کا ذریعہ معاش اور تیس ملین ڈالر آبپاشی کے بنیادی ڈھانچے کا حصہ شامل ہے ۔پی ایس ڈی پی 2024-25 میں بلوچستان میں تعمیر نو کے منصوبوں کے لیے 11.2 بلین روپے مختص کیے گئے ہیں۔ فورم کی جانب سے سندھ میں شروع کیے جانے والے متعدد منصوبوں کی بھی منظوری دی گئی۔ان منصوبوں میں 296 ارب روپے کی لاگت سے نظرثانی شدہ فلڈ ریسپانس ایمرجنسی ہاؤسنگ پراجیکٹ بھی شامل ہے ۔اس میں وفاقی حکومت کی جانب سے 50 ارب روپے کا وعدہ کیا گیا ہے ۔پی ایس ڈی پی 2024-25 میں سندھ میں مکانات کی تعمیر نو کیلئے وفاقی حصہ کے طور پر تیس ارب روپے مختص کیے گئے ہیں۔
سندھ اے ڈی پی میں شامل دیگر منصوبوں میں جن کی منظوری دی گئی تھی ان میں کراچی واٹر اینڈ سیوریج سروسز امپروومنٹ پراجیکٹ فیز II اور کراچی کا مسابقتی اور رہنے کے قابل شہر شامل ہیں۔فورم نے کراچی میں 13.502 بلین روپے کی لاگت سے گرین لائن بی آر ٹی ایس کے آپریشنل کرنے کے نظرثانی شدہ پی سی ون کی بھی منظوری دی ۔ سی پیک کے تحت آنے والے منصوبوں میں سے فورم نے تھاکوٹ اور رائے کوٹ کے درمیان کے کے ایچ کی ری الائنمنٹ کو 13.067 بلین آر ایم بی کی معقول لاگت کے ساتھ ساتھ نیو گوادر انٹرنیشنل ایئرپورٹ کے نظرثانی شدہ پی سی ون کی منظوری دی۔گوادر کا نیا ہوائی اڈہ کیلنڈر سال میں آپریشنل ہو جائے گا۔ فورم نے ایم ایل ۔ ون کی اپ گریڈیشن کے لیے دوبارہ ترمیم شدہ پی سی ون کو کلیئر نہیں کیا اور پاکستان ریلویز کو مشورہ دیا کہ وہ چھوٹے منصوبوں اور پیکیجوں کی تیاری پر غور کرے جو فنانسنگ اور عمل درآمد کے لیے مخصوص ہوں۔ وفاقی حکومت اور صوبوں کے درمیان یکساں طور پر شیئر کرنے کے لیے 68.25 ارب روپے کی لاگت سے ہیپاٹائٹس سی کے انفیکشن کے خاتمے کے لیے وزیراعظم کے پروگرام کی بھی منظوری دی گئی۔
