کراچی :سوشل میڈیا شخصیت ساحل عدیم کے خلاف مقدمہ درج
کراچی (مانیٹرنگ ڈیسک) سوشل میڈیا شخصیت ساحل عدیم کے خلاف کراچی میں مقدمہ درج کرلیا گیا۔نجی ٹی وی کے مطابق مقدمے میں کہا گیا کہ ساحل عدیم نے سندھی قوم کے لیے نازیبا الفاط استعمال کیے۔
جس سے سندھی قوم کی دل آزاری ہوئی۔ ساحل عدیم کے خلاف مقدمہ کراچی سٹی کورٹ تھانے میں وکیل کی مدعیت میں درج کیا گیا۔ ذرائع کا کہنا ہے کہ اگر ساحل عدیم نے مقدمے کے بعد تعاون نہ کیا تو ان کی گرفتاری بھی عمل میں لائی جاسکتی ہے ۔ واضح رہے کہ 4 جولائی کو رکن سندھ اسمبلی ماروی فصیح نے ساحل عدیم کے خلاف مذمتی قرارداد سندھ اسمبلی میں جمع کرائی تھی۔قرارداد میں کہا گیا تھا کہ ایوان نام نہاد موٹیویشنل اسپیکر ساحل عدیم کے اس ریمارکس کی شدید مذمت کرتا ہے ۔ساحل عدیم کے تبصرے ہماری مذہبی، سماجی اور قانونی اقدار کی سخت خلاف ورزی ہیں، جس کی وجہ سے خواتین کو بڑے پیمانے پر تکلیف ہوئی ہے ۔
