رواں مالی سال: 8500ارب قرض لینے کا پلان تیار :وزارت خزانہ
اسلام آباد (نمائندہ دنیا)رواں مالی سال 25-2024 کے دوران 8500 ارب روپے قرض لینے کا پلان تیار کر لیا گیا ہے ۔وزارت خزانہ کے مطابق رواں مالی سال میں 92 فیصد قرض مقامی ذرائع اور 8 فیصد بیرونی ذرائع سے حاصل کیا جائے گا۔
مقامی ذرائع سے قرض حاصل کرنے کیلئے پاکستان انویسٹمنٹ بانڈز، اجارہ سکوک بانڈ جاری کیے جا ئیں گے ، مقامی فنانسنگ کیلئے 3 ماہ، 6 ماہ اور 12 ماہ کیلئے شارٹ ٹرم کیلئے ٹی بلز کا اجرا نہیں کیا جائے گا۔رواں مالی سال کے دوران حکومت مرکزی بینک سے کوئی قرض نہیں لے گی، کلائمیٹ اینڈ ڈیزاسٹر ریزیلینس پروگرام کے تحت اے ڈی بی سے 40 کروڑ ڈالر قرض لیا جائے گا، وومن انکلوسیو فنانس پروگرام کے تحت اے ڈی بی سے 10 کروڑ ڈالر قرض لیا جائے گا۔وزارت خزانہ کے مطابق ڈومیسٹک ریسورس موبلائزیشن پروگرام کے تحت 30 کروڑ ڈالر قرض حاصل کیا جائے گا، رواں مالی سال 1 ارب 20 کروڑ ڈالر کا کمرشل قرض حاصل کیا جائے گا۔عالمی مارکیٹ میں گرین بانڈز اور چائنیز مارکیٹ میں پانڈا بانڈز جاری کرنے کا پلان بنایا گیا ہے ۔
