اب عالمی سطح پر بھی پتہ چل گیا الیکشن کیسے ہوتےہیں:ہم ووٹ الف کو دیتے ہیں اور حکومت میں ب آجاتا:پگارا
نصیر آباد(دنیا نیوز)حر جماعت کے روحانی پیشوا اور مسلم لیگ فنکشنل کے سربراہ پیر پگارا نے کہا ہے کہ ہم ووٹ الف کو دیتے ہیں اور حکومت میں ب آ جاتا ہے ۔
ہمیں تو پتہ ہے 70 سال سے الیکشن کیسے ہو رہے ہیں، اس بار عالمی سطح پر بھی پتہ چل گیا کہ الیکشن کیسے ہوتے ہیں۔پریس کانفرنس کرتے ہوئے انہوں نے کہا اب یہ حکومت بنائی ہے جو چل ہی نہیں رہی بلکہ جھوٹ پر قائم ہے ، ملک میں روزگار نہیں دے سکتے تو عزت ہی دے دیں۔پیر پگارا نے کہا ہے کہ حکومت میں بیٹھے ہوئے لوگ ایک دوسرے کے ساتھ جھوٹ بول رہے ہیں، آپ کے اور میرے ووٹ سے نہ حکومت بنتی ہے اور نہ ٹوٹتی ہے ۔انہوں نے کہا کہ عزت دار لوگ سیاست سے باہر ہو جائیں گے تو پھر ٹھیکیدار ملک چلائیں گے ، ہمیں ملک کے لیے سوچنا ہوگا، سیلاب ہو یا دیگر آفات مدد کے لیے فوج ہی آتی ہے ۔ سب قانون کے مطابق چلیں گے تو بہتر ہو گا ورنہ پھر گاڑی اسی طرح چلے گی۔پیر پگارا کا کہنا ہے کہ پانی کا مسئلہ ہے جہاں بھی گیا تو لوگوں کا حال دیکھ کر افسوس ہوا، ایسے بھی علاقے ہیں جہاں پینے اور نہانے کے لیے پانی نہیں ہے ، اگر صدر زرداری نے کینالز کے لیے این او سی دیا ہے تو ہم تو کچھ نہیں کر سکتے ۔ سیلاب کے سیزن میں لوگ پانی کے لیے لڑ رہے تھے کہ بند نہ ٹوٹ جائے ، بعد میں کیا حال ہو گا؟ سندھ کو پانی ملے گا تو بلوچستان کی طرف آئے گا۔
