سعودی عرب : منشیات کیس میں بے گناہ پاکستانی خاندان رہا ڈرگ گینگ کے 9ملزم گرفتار
لاہور (مانیٹرنگ ڈیسک)سعودیہ میں گرفتار بے گناہ خاندان کو رہائی مل گئی،ایئرپورٹ پر بیگ ٹیگ تبدیل کرکے بے گناہ خاندان کو پھنسانے والے انٹرنیشنل ڈرگ گینگ کے 9ملزموں کو گرفتارکرلیا گیا۔
محسن نقوی کی خصوصی ہدایت پر اے این ایف ٹیم کی کاوشوں سے خاندان کے 5افراد واپس وطن آگئے ۔وفاقی وزیرداخلہ و انسداد منشیات محسن نقوی نے منشیات کیس سے رہائی پانے والے بے گناہ خاندان سے ان کی رہائش گاہ پر جاکر ملاقات کی، ڈی جی اینٹی نارکوٹکس فورس میجر جنرل عبدالمعید بھی ہمراہ تھے ۔وزیر داخلہ و انسداد منشیات محسن نقوی نے متاثرہ خاندان سے دلی ہمدردی کا اظہار کیا اور کہا کہ آپ کو جو تکلیف اٹھانا پڑی وہ الفاظ میں بیان نہیں کی جا سکتی۔ محسن نقوی کا کہنا تھا کہ اے این ایف نے دن رات محنت کر کے انٹرنیشنل گینگ کا سراغ لگایا اور اصل ملزموں کو گرفتار کیا، سعودی عرب کی حکومت نے بھی بہت تعاون کیا ۔ سعودی حکومت کا شکریہ ادا کرتا ہوں۔ انہوں نے کہا بے گناہ خاندان کی رہائی کے لیے فوری اقدامات پر ڈی جی اے این ایف میجر جنرل عبدالمعید اور ان کی پوری ٹیم کی کارکردگی کو سراہا اور کہا کہ اے این ایف کی ٹیم کو خصوصی ایوارڈز دیں گے ، اے این ایف کی ٹیم نے اللہ تعالٰی کو راضی کیا ہے ۔ میڈیا سے گفتگو کرتے ہوئے محسن نقوی نے کہا ہے کہ مفت عمرہ کرانے والے دھوکے بازوں سے محتاط رہیں۔ایک فیملی سے منشیات سے بھرا بیگ پکڑا گیا تھا۔ تاہم اس کیس کو 48 گھنٹے میں حل کر لیا گیا۔انہوں نے کہا کہ اینٹی نارکوٹک فورس (اے این ایف) کی ٹیم فیملی کو سعودی عرب سے پاکستان واپس لائی۔محسن نقوی نے کہا کہ اے این ایف سمگلنگ کے خلاف بہترین کام کر رہا ہے ، آنے والے دنوں میں منشیات کے خلاف کارروائیوں کے نتائج نظر آئیں گے ۔ 3 ہزار کی فورس کے ساتھ منشیات پر مکمل قابو ممکن نہیں تاہم اے این ایف کی فورس کو بڑھانے پر بھی کام ہو رہا ہے ۔متاثرہ خاندان کے فرد ملک ارشد نے گفتگو کرتے ہوئے کہا کہ اے این ایف کی ٹیم نے انتہائی محنت سے کیس لڑا، اسطرح کوئی اپنا بھی کیس نہیں لڑتا، ہم آپ اور اے این ایف کی ٹیم کے شکر گزار ہیں۔متاثرہ شخص ہارون علی نے کہا کہ محسن نقوی اور اے این ایف کے ڈی جی میجر جنرل عبدالمعید نے جو کام کیا وہ الفاظ میں بیان نہیں کر سکتے ، آپ کے لئے دل سے دعائیں نکلتی ہیں۔ادھر اے این ایف نے کیمروں کی مدد سے تمام انٹری اور ایگزٹ پوائنٹس کا جائزہ لیا، ایک پورٹر کو حراست میں لے کر تفتیش کی گئی تو پورا گینگ بے نقاب ہوا، انٹرنیشنل ڈرگ گینگ کے سرغنہ سمیت 9 ملزمان کو گرفتار کر لیا گیا ہے ، اے این ایف نے تمام شواہد سعودی حکام کو دئیے جس پر متاثرہ خاندان کی رہائی ممکن ہوئی۔
