ایڈووکیٹ جنرل سمیت 9 وکلا کو لاہور ہائیکورٹ میں ایڈیشنل جج بنانے کی منظوری
لاہور، اسلام آباد (محمداشفاق ،حسیب ریاض ملک)چیف جسٹس پاکستان جسٹس یحییٰ آفریدی کی زیر صدارت جوڈیشل کمیشن نے ایڈووکیٹ جنرل سمیت 9وکلا کو لاہور ہائیکورٹ میں ایڈیشنل جج مقررکرنے کی منظوری دے دی۔
جوڈیشل کمیشن کے اجلاس میں چیف جسٹس عالیہ نیلم اور دیگر ممبران نے شرکت کی،اجلاس میں لاہور ہائی کورٹ میں 10 ایڈیشنل ججز کی تعیناتی پر غور کیا گیا،جوڈیشل کمیشن کو 10 ایڈیشنل ججز کیلئے 49 نامزدگیاں موصول ہوئیں، 10 ایڈیشنل ججز کی تعیناتی کیلئے 4 ڈسٹرکٹ سیشن ججز اور 45 سینئر وکلا کے نام زیر غور تھے ۔جوڈیشل کمیشن نے 9 وکلا کے ناموں پر اتفاق کیا اور انہیں جج بنانے کی منظوری دیدی ۔ایڈووکیٹ جنرل پنجاب خالد اسحاق ،حسن نواز مخدوم، ملک وقار حیدر اعوان، سردار اکبر علی ڈوگر، ملک جاوید اقبال وینس، سید احسن رضا کاظمی، جواد ظفر، ملک اویس خالد اور سلطان محمود کی بطور ایڈیشنل جج لاہور ہائیکورٹ تقرری کی منظوری دی گئی۔خالد اسحاق نے بطور ایڈووکیٹ جنرل پنجاب اپنا استعفیٰ گورنر پنجاب کو بھجوادیا ، ایڈووکیٹ جنرل پنجاب کا عارضی چارج کسی لا افسر کو دینے پر غور کیا جارہا ہے ۔لاہور ہائیکورٹ میں ججز کی اسامیوں کی کل تعداد 60 ہے ، اس وقت لاہور ہائیکورٹ میں 34 ججز فرائض سر انجام دے رہے ہیں جبکہ 26اسامیاں خالی ہیں، لاہور ہائیکورٹ میں آخری مرتبہ ججز کی خالی اسامیوں پر 13 وکلا کی بطور جج تقرری 7 مئی 2021 کو ہوئی تھی اور اس کے بعد ایک بھی جج کی تقرری نہیں ہو سکی جس سے زیر التوا مقدمات کی تعداد میں نہ صرف اضافہ ہوا بلکہ سائلین کو بروقت انصاف کی فراہمی میں رکاوٹیں پیدا ہوئیں۔پونے چار سال بعد ابتدائی طور پر 9 خالی اسامیوں کو پُر کیا گیا جبکہ مزید 16 اسامیوں کو بھی مرحلہ وار پُر کیا جائے گا، نامور وکلا کی بطور ایڈیشنل جج تقرری پر قانونی ماہرین نے چیف جسٹس عالیہ نیلم کو خراج تحسین پیش کیا۔سینئر قانون دان احسن بھون نے کہا جن وکلا کا بطور جج تقرر ہوا ان کے کردار پر کوئی انگلی نہیں اٹھا سکتا یہ انتہائی لائق اور باوقار وکلا ہیں ، چیف جسٹس عالیہ نیلم کے اقدامات قابل ستائش ہیں ،ایڈووکیٹ سپریم کورٹ نصیر کمبوہ نے کہا ایسے لوگ ہی جج بنیں گے تو سسٹم مضبوط ہوگا ،ایڈووکیٹ قرۃ العین نے کہا چیف جسٹس عالیہ نیلم نے پہلے وکلا کی فلاح کے لیے تاریخی اقدامات کیے اب نامور وکلا کا بطور جج تقرر ہوا ان اقدامات پر چیف جسٹس عالیہ نیلم کو خراج تحسین پیش کرتے ہیں ۔
