ڈی جی اٹامک انرجی ایجنسی کا زیر تعمیرچشمہ پاورپلانٹ کا دورہ
اسلام آباد (نیوز ایجنسیاں،مانیٹرنگ ڈیسک) ڈائریکٹر جنرل انٹرنیشنل اٹامک انرجی ایجنسی نے زیر تعمیر چشمہ پاور پلانٹ یونٹ 5 کا دورہ کیا۔دفتر خارجہ کے مطابق پاکستان کے نیوکلیئر پاورجنریشن پروگرام کو کامیاب پروگرام قرار دیاگیا۔
زیادہ پائیدار اور ڈی کاربنائزڈ بجلی کی پیداوار کیلئے جوہری توانائی کے کردار پر زور دیا گیا،رافیل ماریانو گروسی نے چشمہ میں ریڈیو ایکٹیو ویسٹ انسینریٹر کا بھی افتتاح کیا۔علاوہ ازیں ڈی جی انٹرنیشنل اٹامک انرجی ایجنسی نے انسٹیٹیوٹ آف نیوکلیئر میڈیسن اینڈ آنکولوجی لاہور کا دورہ بھی کیا،انہوں نے کینسرہسپتال میں تشخیص و علاج کی سہولیات کا جائزہ لیا۔رافیل ماریانو گروسی نے معیاری صحت کی سہولیات کیلئے پاکستان اٹامک انرجی کمیشن کی کوششوں کو سراہا،انہوں نے کہا کہ پاکستان میں یہ ادارہ کینسر کے علاج اور دیکھ بھال کیلئے نہایت قیمتی اثاثہ ہے ۔آپ کو انسٹیٹیوٹ آف نیوکلیئر میڈیسن اینڈ آنکولوجی جیسے ہسپتال پر فخر ہونا چاہیے ،ہسپتال میں موجود سہولیات بہترین طبی عملے کی فرض سے وابستگی کو ظاہر کرتی ہے ۔پاکستان اٹامک انرجی کمیشن کے 20 کینسر ہسپتال انسانیت کی عظیم خدمت کر رہے ہیں ،پاکستان اٹامک انرجی کمیشن کو مکمل تعاون فراہم کریں گے ۔ڈائریکٹر جنرل انٹرنیشنل اٹامک انرجی ایجنسی نے نئی لیبارٹری اور طبی سہولیات کا افتتاح بھی کیا۔
