عمران کو ریلیف ملنا شروع ،مزید بھی ملے گا: ندیم افضل چن
لاہو(آئی این پی ) پیپلزپارٹی کے سینئر رہنما ندیم افضل چن نے کہا ہے کہ بانی پی ٹی آئی کی گارنٹی سعودی عرب، امریکا، برطانیہ اور متحدہ عرب امارات دے سکتے ہیں، عمران خان کو ریلیف ملنا شروع ہو گیا ، مزید بھی ملے گا۔
تحریک انصاف کے سٹیک ہولڈرز کے ساتھ مذاکرات چل رہے ہیں۔ایک انٹرویو میں ان کا کہنا تھا کہ اگر پاکستان کی تاریخ دیکھی جائے تو اتنے عرصے کے بعد ریلیف ملنا شروع ہوجاتا ہے ، سیاسی استحکام تب ہوتا ہے جب سیاست اپنے روایتی طریقے سے چل رہی ہو۔پی پی رہنما کا کہنا تھا کہ جب سیاستدان گڈ گورننس، شفاف الیکشن اور ریفارمز کی طرف آئیں گے تو سیاسی استحکام آجائے گا، اگر انتخابی اصلاحات اور شفاف الیکشن نہ ہوئے تو نئے انتخابات کا فائدہ نہیں، اگر اب سیاستدان مل کر نہ بیٹھے تو ہم پاکستانی عوام کے قومی مجرم ہوں گے ، تمام سیاسی جماعتوں کو میز پر بیٹھنے کے لیے اپنی انا کو قربان کرنا پڑے گا۔ ایک سوال پر کہ کیا بلاول بھٹو اسی اسمبلی کے ذریعے و زیراعظم بنیں گے ؟ اس پر ندیم افضل چن نے جواب دیا کہ یہ کہنا ابھی قبل از وقت ہے ، ان سے پوچھا گیا کہ پی ٹی آئی کو اگر ریلیف ملا تو کیا پیپلز پارٹی ان کے ساتھ حکومت بنانا چاہے گی؟ جس پر پی پی رہنما نے کہا کہ پی ٹی آئی کے ساتھ حکومت بن سکتی ہے ۔
