مطلقہ بیٹیاں والد کی پنشن میں برابر کی حقدار:سندھ ہائیکورٹ
کراچی (مانیٹرنگ ڈیسک) سندھ ہائیکورٹ نے اپنے فیصلے میں کہا ہے کہ مرحوم والد کی ماہانہ پنشن میں طلاق یافتہ بیٹیوں کو بھی وہی حصہ ملے گا جو غیر شادی شدہ بیٹیوں کو دیا جاتا ہے اور یہ حق تب تک برقرار رہے گا جب تک وہ دوبارہ شادی نہ کر لیں۔
متعلقہ حکام درخواست گزار ثروت غازی الدین سمیت تمام غیرشادی شدہ، بیوہ اور طلاق یافتہ بیٹیوں کو ان کا جائز حصہ فراہم کریں اور یہ عمل ترجیحی بنیادوں پر 4 ماہ کے اندر مکمل کیا جائے ۔ یہ مقدمہ ایک طلاق یافتہ خاتون ثروت غازی الدین کی جانب سے سندھ ہائی کورٹ میں دائر کیا گیا تھا، جن کے والد غازی الدین 1990 میں کالج ایجوکیشن ڈپارٹمنٹ سے اسسٹنٹ پروفیسر کے طور پر ریٹائر ہوئے اور جنوری 2023 میں وفات پا گئے ۔ درخواست گزار کا مؤقف تھا کہ وہ اپنی غیرشادی شدہ بہن کے ساتھ والد کی پنشن میں برابر کی حصہ دار ہیں، لیکن انہیں ان کے اس حق سے محروم رکھا جا رہا ہے ۔ عدالت نے قانون کے مطابق طلاق یافتہ خواتین کو ان کے حقوق کی فراہمی یقینی بنانے کے احکامات جاری کر دیے ۔
