پاکستانی صحافیوں کے دورہ اسرائیل کی رپورٹس کا نوٹس لیا :دفترخارجہ
اسلام آباد(دنیا نیوز،مانیٹرنگ ڈیسک) حکومت نے صحافیوں کے اسرائیل جانے کی رپورٹس کا نوٹس لے لیا۔ترجمان دفتر خارجہ شفقت علی خان نے پاکستانی صحافیوں کے دورہ اسرائیل پر سوالات کا جواب دیا اور بتایاکہ حکومت نے صحافیوں کے اسرائیل جانے کی رپورٹس کا نوٹس لیا ہے ۔
انہوں نے کہا کہ پاسپورٹ پر درج ہے یہ ‘اسرائیل کے سفر کے لیے قابل استعمال نہیں’، موجودہ قوانین کے تحت پاسپورٹ پر اسرائیل کا دورہ ممکن نہیں۔پاکستان کا اسرائیل کے بارے میں مؤقف تبدیل نہیں ہوا، پاکستان اسرائیل کو تسلیم نہیں کرتا اور پاکستان فلسطینی عوام کے جائز حقوق کی غیر متزلزل حمایت کرتا ہے ۔ ان حقوق میں 1967 سے پیشگی سرحدوں پر مشتمل آزاد و خودمختار فلسطینی ریاست کا قیام شامل ہے ، آزاد و خود مختار فلسطینی ریاست کا دارالحکومت القدس الشریف ہو۔ پاکستان مسئلہ فلسطین کے منصفانہ حل کے لئے غیر متزلزل وابستگی کا اعادہ کرتا ہے ۔خیال رہے اسرائیلی میڈیا نے 11 پاکستانیوں پر مشتمل وفد کے رواں ماہ اسرائیل کے دورے کی تصدیق کی ہے ۔اسرائیلی میڈیا کے مطابق پاکستانیوں کے وفد میں صحافی، دستاویزی فلمساز اور سول سوسائٹی کے رہنما شامل تھے ۔رپورٹ کے مطابق پاکستانی وفد نے اسرائیل کے ہولوکاسٹ میوزیم اور 7 اکتوبر 2023ء کے حملوں کے مقامات اور دیگر جگہوں کا دورہ کیا۔میڈیا رپورٹ کے مطابق دورہ شراکہ نامی ایک غیر منافع بخش تنظیم نے ترتیب دیا، جو مشرق وسطیٰ میں مکالمے اور بقائے باہمی کو فروغ دینے کے لیے کام کرتی ہے ، اس پروگرام کا مقصد عرب اور مسلم دنیا میں رواداری کو فروغ دینا تھا۔وفد میں شامل پاکستانی صحافی سبین آغا کا کہنا تھا کہ دورے کا مقصد اسرائیلی ثقافت اور لوگوں کو سمجھنے کی کوشش کرنا تھا، اگر سعودی عرب جیسے ممالک اسرائیل کے ساتھ تعلقات کو بہتر کرتے ہیں تو پاکستان کے لئے بھی یہ آسان ہو سکتا ہے ۔
