جسٹس طارق محمود جہانگیری کی ڈگری کامعاملہ،درخواست کی فوری سماعت کی استدعا منظور
کراچی (سٹاف رپورٹر) سندھ ہائیکورٹ نے اسلام آباد ہائی کورٹ کے جسٹس طارق محمود جہانگیری کی ڈگری کے معاملے پر جامعہ کراچی کی درخواست کی فوری سماعت کی استدعا منظور کرلی۔
سندھ ہائی کورٹ کے دو رکنی آئینی بینچ نے اسلام آباد ہائی کورٹ کے جسٹس طارق محمود جہانگیری کی ڈگری کے معاملے پر دائر مختلف درخواستوں کی سماعت کی۔ جسٹس آغا فیصل نے جامعہ کراچی کے وکیل سے استفسار کیا کہ کیس کیا ہے مسئلہ کیا ہے ؟ جامعہ کراچی کے وکیل سرمد ہانی نے جواب دیا کہ جسٹس طارق محمود جہانگیری کی ڈگری کا مسئلہ ہے ، عدالت نے سینڈیکیٹ اور انفیئر مینز کمیٹی کی کارروائی کے خلاف حکم امتناع جاری کررکھا ہے ، کیس فوری سنا جائے ۔ عدالت نے کہا کہ جب سماعت ہوگی تو دیکھ لیں گے ۔ عدالت نے درخواست کی فوری سماعت کی استدعا منظور کرتے ہوئے فریقین کو نوٹس جاری کردیے ۔ عدالت نے کیس کی مزید سماعت چار ہفتوں کے لیے ملتوی کردی۔ سندھ ہائی کورٹ نے ان فیئر مینز کمیٹی کی سفارشات اور سینڈیکیٹ کا فیصلہ معطل کر رکھا ہے ۔ عدالت نے جامعہ کراچی کو معاملے پر کسی بھی کارروائی سے روک رکھا ہے ، عدالت نے پیمرا کو ان فیئر مینز کمیٹی سے متعلق خبروں سے بھی روک رکھا ہے ، عدالت نے ایف آئی اے کو ڈگری سے متعلق تحقیقات سے بھی روک رکھا ہے ۔
