ملٹری کورٹ سے سزا یافتہ ملزموں کی رہائی کی درخواستیں خارج
پشاور:(دنیا نیوز)پشاور ہائیکورٹ نے ملٹری کورٹ سے سزا یافتہملزمان کی سزا مکمل ہونے پر 382 بی کا فائدہ دیکر رہا کرنے کی دائر درخواستیں خارج کردیں۔عدالت نے 8 صفحات پر مشتمل فیصلہ جاری کردیا جس میں کہا گیا ہے کہ ملزموں کو آرمی ایکٹ کے تحت سزائیں دی گئیں، آرمی ایکٹ سپیشل لا ہے ۔
ایڈیشنل اٹارنی جنرل کے مطابق ملزموں کو سیکشن 382 بی کا فائدہ دیا جا چکا ، ملزموں کو سپیشل لا کے تحت سزائیں دی گئی ہیں، عام قانون پر اس کو فوقیت حاصل ہے ۔فیصلے میں کہا گیا ہے کہ درخواستگزار کے مطابق سزا مکمل ہونے کے باوجود ملزم جیل میں ہیں، سزا مکمل ہونے کے باوجود رہائی نہ ہونا آئین کے آرٹیکل 9، 13، 14، 25 کی خلاف ورزی قرار دیا گیا، ایڈیشنل اٹارنی جنرل کے مطابق ملٹری کورٹ سزا اس وقت سے شروع ہو گی جس دن کارروائی مکمل ہو کر دستخط ہوتے ہیں۔عدالت نے فیصلے میں یہ بھی کہا ہے کہ ملزموں کی درخواستیں خارج کی جاتی ہیں۔
