پی ٹی آئی کا ملک گیر تحریک کا اعلان، رہنماؤں کو تیاری کی ہدایت
اسلام آباد (اپنے نامہ نگار سے ،مانیٹرنگ ڈیسک)تحریک انصاف نے ملک گیر تحریک شروع کرنے کا اعلان کر دیا جبکہ پارٹی ممبران اور حامیوں کو تیار رہنے کی ہدایت کر دی تاہم کسی تاریخ کا اعلان نہیں کیا گیا۔
سوشل میڈیا پلیٹ فارم ایکس پر پوسٹ میں پی ٹی آئی سینیٹر علی ظفر نے لکھا سابق وزیراعظم سے 6 گھنٹے طویل ملاقات ہوئی، تمام امور پر تبادلہ خیال ہوا۔ کچھ بہت اہم معاملات پر بھی تبادلہ خیال ہوا، ان میں ایک ملک گیر تحریک بھی شامل تھی جس کیلئے پارٹی کو تیاری کرنی چاہیے اور اچھی طرح منظم ہونا چاہیے ۔سینیٹر علی ظفر نے خبردار کیا کہ عمران خان نے کہا ہے کہ پی ٹی آئی میں کسی کیلئے بھی دونوں طرف کھیلنے کی گنجائش نہیں، ہر کسی کو سچائی اور انصاف کیلئے متحد رہنا چاہیے ۔عمران خان کا حوالہ دیتے انہوں نے مزید لکھا میں قوم کی خاطر جیل میں تمام مشکلات برداشت کر رہا ہوں، پی ٹی آئی قیادت کو قربانی سے نہیں ڈرنا چاہیے تاہم سینیٹر علی ظفرنے یہ نہیں بتایا کہ یہ تحریک کب شروع ہوگی۔دریں اثنا عمران کی بہن علیمہ خان نے بھی اڈیالہ جیل کے باہر صحافیوں سے بڑے پیمانے پرعوامی تحریک بارے بات کی، اگرچہ انہوں نے بھی نہیں بتایا یہ تحریک کب شروع ہوگی۔علیمہ خان نے کہا عمران خان نے پارٹی کو تیار رہنے کی ہدایات جاری کی ہیں اورکہا ہے کہ میں کسی کو اسلام آباد نہیں بلاؤں گا کیونکہ وہ (حکام)سنائپر رائفلیں لے کر بیٹھے ہیں اور لوگوں کو گولی ماری دی جاتی ہے ۔ اس سے مجھے بہت تکلیف ہوتی،میں ایسا نہیں کروں گا۔علیمہ خان کے مطابق عمران خان نے کہا ہے کہ پارٹی کو تیار رہنا چاہیے ، وہ جلد پورے پاکستان میں بڑی عوامی تحریک کا اعلان کرینگے۔
