کوئٹہ:دہشتگردوں کا حملہ،کوئلہ کان مالک بھائی سمیت جاں بحق،6افراد زخمی
کوئٹہ(مانیٹرنگ ڈیسک)کوئٹہ کے نواحی علاقے ہنہ کلی منگل میں فتنہ الہندوستان کے دہشت گردوں کے حملے میں قبائلی رہنما کوئلہ کان مالک سردار عبدالسلام بازئی بھائی سمیت بم دھماکے میں شہید جبکہ 6 افراد زخمی ہوگئے۔
دہشت گردوں نے کوئلہ کان اور سامان کو نذر آتش کردیا اور پہاڑوں کی طرف فرار ہوگئے کوئٹہ کے نواحی علاقے ہنہ، اوڑک کلی منگل کے قریب کوئلہ کانوں پر فتنہ الہندوستان سے وابستہ 2 سو کے قریب مسلح دہشتگردوں نے اچانک حملہ کردیا پولیس کے مطابق حملہ آوروں نے کوئلہ کانوں اور وہاں موجود سامان کو نذرِ آتش کردیا ۔واقعے کی اطلاع ملتے ہی کوئلہ کان مالکان موقع پر پہنچے اور حملہ آوروں کے ساتھ فائرنگ کا تبادلہ ہوا ۔مسلح دہشتگرد فائرنگ کے بعد پہاڑوں کی طرف فرار ہوگئے ، تاہم جاتے جاتے انہوں نے مختلف مقامات پر بارودی مواد نصب کر دیا ۔کوئلہ کان مالکان اور ان کے ساتھی تعاقب میں آگے بڑھنے کے دوران نصب بم کی زد میں آ گئے اور بم زوردار دھماکے سے پھٹ گیا جس کے نتیجے میں کوئلہ کان مالک قبائلی رہنما سردار عبدالسلام بازئی اور ان کا بھائی عبدالنافع بازئی موقع پر ہی شہید ہوگئے جبکہ ان کے 6 ساتھی زخمی ہوگئے ۔جاں بحق اور زخمیوں کی شناخت عبد السلا م ولد عبد اللہ جان قوم کاکڑ بازئی سکنہ کلی منگل اور عبد النافع ولد عبد اللہ جان قوم کاکڑ بازئی سکنہ کلی منگل ہنہ ،زخمیوں میں جانان ، سیف الرحمن، سمیع اللہ، محمد آصف اور نصیب اللہ کے ناموں سے ہو گئی ۔اُدھر ضلع مستونگ میں نامعلوم مسلح افراد نے لیویز فورس کے ایک تھانے کو نذر آتش کردیا ہے ۔ آگ کی وجہ سے تھانے کی عمارت کو نقصان پہنچا تاہم کوئی جانی نقصان نہیں ہوا۔
