بجٹ میں ہر چیز مہنگی، عنقریب اے پی سی طلب کرینگے : فضل الرحمٰن
لاہور(آئی این پی)جمعیت علماء اسلام (ف) کے سربراہ مولانا فضل الرحمن نے کہا ہے کہ بجٹ میں ہر چیز کو مہنگا کردیا گیا، غریب آدمی کی قوت خرید جواب دے رہی ہے، حکومت کی غلط پالیسیاں غربت میں اضافہ کررہی ہیں،جے یو آئی عنقریب اس اہم معاملے پر آل پارٹیز کانفرنس طلب کرے گی۔
ان خیالات کا اظہار انہوں نے متحدہ ایکشن کمیٹی سرکلر روڈ کے وفد سے گفتگو کرتے ہوئے کیا ۔ایکشن کمیٹی نے مولانا فضل الرحمن کو شاہ عالم مارکیٹ و سرکلر روڈ پر سات ہزار دکانوں پانچ سو گھروں کی ممکنہ مسماری پر بریفنگ دیتے ہوئے لاکھوں افراد کا روزگار بچانے کے لیے کردار ادا کرنے کی اپیل کی اور کہا کہ جے یو آئی نے ہمیشہ مظلوم کا ساتھ دیا ہے ہم بھی مولانا فضل الرحمن سے تعاون چاہتے ہیں۔ حکومت ہمارا روزگار چھیننا چاہتی ہے ،فضل الرحمن کی طاقت اور سیاسی حکمت عملی کے سامنے حکومت بھی بے بس ہوجاتی ہے ۔ مولانا فضل الرحمن نے تاجروں کی متحدہ ایکشن کمیٹی کے مطالبات کی حمایت کا اعلان کیا ۔ انہوں نے کہا کہ شہر کی خوبصورتی کے لیے لاکھوں افراد کو بیروزگار کرنے کی اجازت نہیں دی جاسکتی، جے یو آئی پوری قوت کے ساتھ تاجر برادری کے ساتھ کھڑی ہے۔ مولانا فضل الرحمن کی ہدایت پر جے یو آئی وفد آج منگل کو شاہ عالم مارکیٹ میں متاثرین سے ملاقات کرے گا۔
